– Løft blikket og sjå mot neste sommar

Festidalen synest det er vondt å ikkje kunna samla publikum på jordet i Uskedalen denne sommaren. Likevel snur dei det negative til noko positivt og lovar å koma knallsterkt tilbake i 2021.

– Dette var venta, og mest truleg rett. Det er godt  få svar, men vondt og tungt å ikkje få samlast på Festidalen i år. Likevel skal me vera glade for at med har politikarar som tek ansvar. Og kva gjer me i slike tider? Me salar hesten og galopperer mot 2021, skriv Festidalen i ei pressemelding.

Pressemeldinga kjem etter at kulturminister Abid Raja laurdag føremiddag gjekk ut og gjorde alle kultur- og idrettsarrangement som samlar meir enn 500 menneske forbode fram til 1. september. Noko som betyr at Festidalen må avlysa årets festival. Men arrangørane legg seg ikkje ned for å sutra av den grunn.

– Dette er ikkje tida for sutring og sjølvmedlidande. Det å ha noko positivt snadder å sjå fram til gjer desse usosiale dagane lettare. Me er sjølvsagt godt i gang med neste sommars Festidalen. Den skal bli så saftig og smakfull at sjølv Brimi skjemmast. Løft blikket og sjå mot neste sommar. Tenk, snart har me knekt desse viruslenkene, og står der på kulturbeitet i Uskedalen med øyrene fulle av godlyd, skriv Festidalen i pressemeldinga.