Nytt smittetilfelle: Ein KVV-klasse har fått beskjed om å ikkje møta på skulen

Marius Tveit Nissestad

Marius Tveit Nissestad

marius@grenda.no

Publisert: 20. november 2020, 07:31

Seint torsdag kveld melde Kvinnherad kommune om eit nytt påvist tilfelle av korona i Kvinnherad. Dette tilfelle har relasjon til KVV.

–  Det var seint torsdag kveld meldt inn ytterlegare eitt smittetilfelle til kommuneoverlegen. Det har etter denne siste meldinga vore kontakt med KVV, og det vert sendt ut melding til ein klasse om å ikkje møta på skulen på fredag. Alle det gjeld er og vil bli kontakta, skriv kommunen på sine heimesider fredag morgon.

Det betyr at det vart registrert to nye tilfelle denne torsdagen. Og at det eine er knytt til KVV, til tross for at det først vart informert ut frå skulen at det var ingen ny smitte med relasjon til KVV etter at dei siste 80 prøvesvara var komen inn.

– Eg har dessverre fått kontramelding frå kommunen. Etter sist melding er det kome inn eit nytt testresultat. Dette er ein positiv test og gjeld ein person som jobbar ved skulen. Den positive testen har relasjon til dei klassane som allereie er tatt ut i karantene. Smittevegen er kjend, skriv rektor Audun Bjelland i ein informasjonsmelding til elevar, tilsette og føresette natt til fredag.

Vedkomande som har fått tilbake positiv koronatest har ikkje vore på skulen etter måndag 16. november. Men for å vera på den sikre sida har kommuneoverlegen bestemt at ein ny skuleklasse skal i karantene.

– Kommuneoverlegen skriv at den positive testen ikkje medfører at andre elevar eller tilsette vert vurdert som primærkontaktar i saka. Han fører likevel til at vi må ha fokus på godt smittevern og at ein må halda seg heime dersom ein føler nokon form for sjukdomssymptom, skriv Bjelland.