Ynskte nyepresten velkomen

På søndag var det innsetjingsgudsteneste for Carsten Mrusek i Uskedal kyrkje.

Carsten Mrusek er tilsett som sokneprest i Uskedalen, Ænes og Åkra sokn, førebels for eitt år. På innsetjingsgudstenesta sundag vart det sagt fram helsingar med gode ynske for den tenesta han skal gjera i Den norske kyrkje. Soknerådsleiar Sigmund Myklebust las brevet frå biskopen i Bjørgvin, Halvor Nordhaug. Prosten i Sunnhordland, Svein Arne Theodorsen, henta orda frå 1. mosebok, kap. 32, om å leva i nåden og dela Guds ord med alle.

Mrusek sin fyrste tale til kyrkjelyden i Uskedalen handla om Efata, eit arameisk ord for det å lata opp, vera open for tru og opna sansane for å vera lyttande til Guds ord. Mrusek kom vidare inn på tru og dåp og stadfestinga av dåpen ved konfirmasjon. Utan dåp - ingen konfirmasjon. Den noko lange talen var gripande å høyra på, klar og tydeleg i det i veksa med trua, nemleg at trua vert til medan vi går.

 

Bur i Jondal

Carsten Mrusek kjem frå Bremen-området i Tyskland, er utdanna jurist og teolog. Han var katolsk prest før han konverterte og vart ordinert til prest i Den norske kyrkje. Saman med familien sin bur Carsten i Jondal, der han har gjort teneste i fleire sokn i Ullensvang herad.

Seinare i haust, tysdag 10. november, kan vi bli meir kjend med soknepresten. Då skal han vera innleiar på temakvelden i kyrkja med tittelen på sitt føredrag «Frå tysk katolisisme til norsk lutherdom».

 

Tekst/foto: Kristian Bringedal/Uskedalen.no