Vond nedteljing frå Totland

Gripande om digitalt mareritt for tenåringsgut.

Ungdomsromanen «Nedteljing» er det ferskaste tilskotet til Anders Totland sitt forfattarskap. Nok ein gong lukkast han med å vera aktuell i temaet, og nok ein gong kjenner ein klumpen i magen veksa etter kvart som ein les seg gjennom boka.

Totland introduserer tidleg Viggo og dei tre venene hans Oskar, Alex og Emma. Sistnemnde er kjærast med Alex, men Viggo er like fullt oppover øyro forelska i ho. Premissane for ulukkeleg ungdomskjærleik er absolutt til stades.

 

Chatroulette

Totland går inn i kjernen av tenåringslivet når han skriv om behovet for å bli sett, frykta for å bli sett utanfor, og kjensla av at eit lite feiltrinn er den største katastrofen du kan bli utsett for.

Gyldendal forlag, som gir ut boka, omtalar det som ein klaustrofobisk spenningsroman. Det er ei svært treffande skildring av boka, der chatroulette og utpressing på nettet er ingrediensar i det som leiar fram til spenningstoppen i romanen.

Peronane i boka er få og enkle å halda oversikta over, dialogen og språket er effektivt, og boka er lettlese. Alt dette er med på å halda godt tak om lesaren, og driva han gjennom romanen. Alle personane i boka er fiktive, men i etterordet fortel Totland at handlinga har mange likskapar med ei hending i 2017, der ein ung norsk mann vart forsøkt utpressa av kriminelle etter å ha brukt chatroulette.

«Nedteljing» er den sjette boka til Totland etter debuten i 2015. Til liks med dei føregåande ungdomsromane hans, opplevest også denne som ei bok som gjer inntrykk på fleire enn berre ungdommar.