Vil ha ungdomen si røyst opp og fram

I starten av mars inviterer Kvinnherad kommune til ungdomskafé både på Husnes og i Rosendal. Det for å engasjera ungdomen i etableringa av det nye ungdomsrådet.

– Her skal prosjektgruppa for ungdomsråd informera ungdomen om vegen vidare og så blir det servert både pizza og brus. Så det blir kult, artig og tøft, seier Anita Lykkja frå prosjektgruppa.

Der sit også Heidi Bolette Jakobsen, og saman inviterte duoen pressa til eit informasjonsmøte rundt ungdomsråd i Kvinnherad måndag føremiddag.

– Etableringa av eit ungdomsråd i Kvinnherad er etter mi meining den viktigaste saka i kommunen akkurat no. Det er innmari viktig at verda består av røysta til fleire enn berre oss vaksne, det er jo ungdomen som skal styra kommunen vår i framtida. Dette ungdomsrådet er ein fin moglegheit for ungdomen å koma med sine innspel om tema dei brenn for, seier Lykkja.

 

Val og konferanse

Kommunestyret klubba gjennom etableringa av ungdomsrådet torsdag. Ungdomsrådet vil i Kvinnherad bli behandla likt med liknande råd som eldrerådet og rådet for personar med nedsett funksjonshemming. Og prosjektgruppa jobbar no for å engasjera ungdom til å delta.

– Difor håpar vi at så mange som mogleg vil ta turen på kafé i ungdomsklubben i Rosendal 4. mars og på Husnes ungdomssenter 6. mars, seier Heidi.

Her blir det informert om stoda rundt ungdomsrådet så langt. I etterkant av kafeane kan dei ungdomane mellom 14 og 18 år som ynskjer å bli med søkja seg inn i rådet og stilla til val.

– 21. mars skal vi så arrangera ein konferanse der det vert eit skikkeleg val av medlemene, seier Heidi.

Det skal veljast sju representantar og tilhøyrande vararepresentantar til ungdomsrådet.