Vil ha publikum tettare på spelarane

I eit brev til Kvinnherad kommune har leiar i Kvinnherad idrettsråd og Halsnøy fotball, Richard Erlandsen, søkt om å få flytta tribunen på «Nya Myro» ut på den gjengrodde løpebanen.

Søknaden kjem etter ei synfaring på Halsnøy i juni i år.

– Det vi såg då var at tribunefasilitetane på grasbanen på Sæbøvik er særdeles dårlege. For det fyrste er tribunen gamal og slitt, og opninga mellom kvart trinn gjer at han også er farleg, spesielt for born. Og eg har med eigne auge sett at born har falle ned, skriv Erlandsen i brevet til kommunen.

Ein annan ting dei noterte seg var avstanden frå tribunen til sjølve banen.

– Det er både eit grusfelt og ein brei løpebane mellom, ein løpebane som også er gjengrodd og som ikkje har vore i bruk på mange, mange år. Dette gjer at sjølve opplevinga som tilskodar vert dårlegare på grunn av ei unødig lang avstand til banen, og som spelar så ynskjer ein også nærleik til publikum, skriv Erlandsen.

Spørsmålet han då stiller kommunen er om det er mogleg å flytta tribunen fram dit løpebanen er i dag. Ettersom tribunen uansett treng vedlikehald, ser Erlandsen at ein også like greitt kan flytta han fram i same slengen.