Vil ha færre oppdrettsanlegg på Vestlandet

Havforskingsinstituttet ynskjer å fjerna 60 oppdrettsanlegg på Vestlandet for å få vekk dei store problema med lus, smittespreiing og høge dødsratar i merdane.

– Vårt forslag er å redusera talet oppdrettsanlegg ganske kraftig, men behalda dei beste lokalitetane og auka produksjonen her, seier forskingsdirektør Geir Lasse Taranger i Havforskingsinstituttet til Bergens Tidende, som først omtalte saka.

Forslaget vart presentert på eit møte mellom Havforskingsinstituttet og oppdrettsnæringa i førre veke. Men sjølv om det er eit radikalt forslag, er ikkje intensjonen at den samla produksjonen skal gå ned, men at produksjonen skal flyttast frå problemanlegg til anlegg med mindre lus og sjukdom.

I dag finst det rundt 167 oppdrettsanlegg i produksjonssone 3, frå Karmøy til Sotra og heile Hardangerfjorden. På sida av dette forslaget vil myndigheitene i løpet av dei neste månadane setja til verks trafikklyssystemet som fortel kor mykje villfisk som dør av lusepresset frå merdane. Lyser det raudt, må produksjonen ned med seks prosent, skriv BT.

Og i skrivande stund lyser heile produksjonssone 3 raudt.

– Sjølv om vi tar vekk rundt ein tredel av talet oppdrettsanlegg, meiner vi det er fullt mogleg å oppretthalda produksjonen. Det skjer ved at 22 prosent av biomassen blir flytta til nye og større anlegg, seier Taranger til avisa.