Viktige koronaråd frå kommuneoverlegen
Kommuneoverlege Glenn André Opland har tysdag lagt ut ny informasjon om innreisekarantene med meir.
Artikkelen held fram under annonsen.
«Alle som kjem til Noreg frå utlandet, med unnatak av gitte område i Europa med tilstrekkeleg låg smittespreiing, skal vera i heimekarantene i 10 dagar. Kva for land/område som er unnateke karanteneplikta («grøne land»), vil kunna endra seg raskt, og den enkelte som er/har vore på reise, pliktar å halda seg oppdatert», skriv Opland på Kvinnherad kommune si heimeside.
«Det er også verdt å ha i bakhovudet at så og seia alle grøne land framleis har ein betydeleg høgare smitteførekomst enn i Noreg», understrekar han.
Helsepersonell med pasientnært arbeid som har vore på reise i grøne land utanfor Norden, skal testast éin gong for SARS-CoV-2 og ikkje ha pasientnært arbeid før negativ test ligg føre. For grøne regionar i Norden ser ein ikkje dette som naudsynt per no.
«Alle som har vore utanlands og utviklar luftvegssymptom bør testast for SARS-CoV-2 og SKAL halda seg heime», opplyser kommuneoverlegen.
Bli heime
Til slutt minner han om at det er gode smittevernrutinar som no held samfunnet i gang.
«Dette gjeld alle og overalt! Hugs god handhygiene, hugs handsprit/handvask før og etter butikk- eller privatbesøk, praktiser god hoste-/nysehygiene, unngå folkemengder så langt det let seg gjera, hald minimum éin meter avstand til andre i det offentlege rom, bli heime ved milde luftvegssymptom og utsett utanlandsreisa om det let seg gjera», oppmodar Glenn André Opland.