Emma Øen Klette stod i stovevindauga og prøvde filma lynet i torevêret på måndag. Då slo det ned i hagen hennar.
– Eg kvakk fælt, og det gjorde veslesøstera mi som stod på sida av meg også, fortel 15-åringen frå Nes i Rosendal.
Annonse
Ho var ikkje den einaste som kvakk i Kvinnherad på måndagsettermiddagen. I firetida braka det laus med lyn og tore som pepra både land og sjø.
Meteorologisk institutt registrerte over 100 lynnedslag i Kvinnherad i løpet av det siste døgeret. Rapportane går på at lyna bevegde seg utover frå Rosendal, og spesielt Herøysundet var tett råka, med over 40 registrerte nedslag. Det er registrert lynnedslag frå Nordrepollen til Klosterfjorden.
– Det var heftig. Og det bråka fælt, medgir Emma, som likevel fryda seg over å ha fanga lynet, og smellen, på video.
