– Velkomne til årets Vårkonsert

Det helsar Rosendal Musikklag, som inviterer til konsert i Rosendal Samfunnshus neste helg. Gjest er trompetsolist Hans Marius Andersen.

– Laurdag 1. april arrangerer musikklaget sin tradisjonelle vårkonsert. Men det er berre tidspunktet som er tradisjonelt, for på årets konsert presenterer vi ein solist heilt i verdsklasse. Den unge trompetaren frå Askøy har verkeleg blitt lagt merke til for sitt glitrande spel både innan jazz og i den klassiske sjangeren, trass sin unge alder, pressemelder Rosendal Musikklag.

Hans Marius Andersen er svært aktiv som solist, og han har delteke og vunne både i regionale og nasjonale konkurransar. Som solist har han halde konsertar både i USA, England, Frankrike og Polen. Denne våren står byar som Berlin, Krakow og New York på turnéplanen.

Hans Marius gav ut sitt første jazzalbum då han var 15 år. Han var inspirert av legenda Miles Davis. Denne våren gjev trompetaren ut sitt tredje album, og han lovar ein ny vri. Musikalsk er han nemleg på veg mot meir instrumental pop. Noko av den musikalske vrien er å laga eigne versjonar av blant andre Michael Jackson og Sting.

 

Mexicanske rytmar

– På konserten får de høyra musikklaget framføra variert og lett musikk, med Hans Marius som solist i fleire av stykka. Mellom anna får de høyra filmmusikk med spanske og mexicanske rytmar, jazzballadar, cubansk-inspirerte tonar, amerikansk storbandmusikk og funky musikk frå gruppa Earth, Wind & Fire sitt repertoar. Solisten skal også framføra ei rekkje songar frå eige repertoar, saman med eige band av dyktige musikarar frå Bergensområdet, vert det opplyst.

Rosendal Musikklag stiller med full besetning, og er klare til å gje publikum ei flott konsertoppleving.

– Konserten høver for konsertgjengarar i alle aldrar. Etterpå blir det ope hus med tid for ein god musikalsk drøs. Ikkje gå glipp av eit musikalsk høgdepunkt denne kvelden, oppmodar arrangøren.