Velkommen til soknerådsval hausten 2019

Til hausten er det kommune- og fylkestingsval. Dette er same dag som det er val til bispedømmeråd og sokneråd. Tysdag 29. januar var sokneråda i Ænes Sokn og Kvinnherad Sokn samla til felles soknerådsmøte for å sjå på mogelege samarbeidsformer for dei neste fire åra. Ænes sokn har rundt 200 medlemmer og Kvinherad sokn rundt 2100 medlemmer, og kyrkjene høyrer til kvar enkelt av desse medlemmane, samstundes som dei høyrer til den verdsvide kyrkja.

Sokneråda er med og legg til rette for trusopplæring, diakoni, kyrkjemusikk, og får vere med og påverke gudstenester og andre tiltak i og rundt kyrkjene våre. Målet er at alle medlemmer i kyrkja skal kjenne at dei høyrer til. Begge kyrkjene er særs viktige for bygdene rundt, dei er frå 11- og 1200-talet, og er nokon av dei eldste bygga i Norge. Dei har samla folk til å dele den kristne trua og vona, gleder og sorger, kvardag og fest. Denne verdien ynskjer vi å vere med og løfte fram vidare.

Ænes sokn skal ha årsmøte i kyrkja etter gudstenesta komande søndag, og Kvinnherad kyrkje søndagen etter. Viktige tema på årsmøta er mogelege samarbeidsformer mellom sokna dei neste fire åra. Ænes sokn skal sjølv bestemme om dei vil vere saman med Kvinnherad sokn. Det er viktig at Ænes får innspel frå alle sine medlemmer i denne saka.

Ei av samarbeidsformene kan vere å ha to val, altså eit sokneråd for Ænes og eit for Kvinnherad, men at alle møta er saman. Ein meir djuptgripande samanslåing ville vore å slå saman Ænes og Kvinnherad sokn til ei eining. Ænes sokneråd informerte Kvinnherad sokneråd om at ein ynskjer forsøke to sokneråd, men felles møte frå valet 2019. Alle i sokneråda vil med dette oppmode alle medlemmer frå 15 år og opp å stemme ved valet, og alle frå 18 år og oppover til å vurdere å vere med i soknerådsarbeid, ta kontakt! Det er dykkar kyrkje!

 

Solfrid H. Siqveland

leiar Kvinnherad sokneråd