Veit du om stader med dårleg mobildekning? Då vil ordføraren høyra frå deg.

Håvard Sætrevik

Håvard Sætrevik

haavard@grenda.no

Publisert: 15. oktober 2020, 12:58

Fredag morgon skal ordførar Hans Inge Myrvold ha møte dekningsdirektøren til Telenor, Bjørn Amundsen.

 

Amundsen har vore direktør for mobildekninga til Telenor sidan 1994, altså heilt tilbake til då det framleis heitte Televerket.

– Han kjenner landet og mobildekninga. Eg ville lufta ein sak med han, og han han inviterte seg sporenstreks hit. Dermed blir det eit møte fredag morgon, fortel Hans Inge Myrvold til Grenda.

– Me har ein del informasjon om korleis det er i Kvinnherad, men det ville vore artig om dei som sit med detaljkunnskap om manglande dekning, tar kontakt slik at eg kan ta det vidare til dekningsdirektøren, seier ordføraren.

Innspela til publikum kan gjerne stå som kommentarar på Facebook-sida hans, eller som kommentarar på saka her.

– Eg lovar alle som kjem med innspel eit svar. Det er ein del parsellar me veit om, men kom med det du veit. Eg er veldig takksam for innspel, slik at me får løfta områda opp til Telenor. Det kan vera at det ikkje er dekning i det heile, og det kan vera at område har opplevd problem då ein gjekk frå 3G til 4G. Ta kontakt, oppmodar Myrvold.