Vanvitig opprykksdrama: – Eg trur ikkje mine eigne auge
Det seier Endre Eide etter at Djerv 1919 sikra opprykket med 3-2 borte mot Hana torsdag kveld. Det etter å ha scora tre mål på overtid.
Då stadionuret på Hanabanen slo 90 torsdag kveld, leia heimelaget 2-0 mot Endre Eide og opprykksjagande Djerv 1919. Og når det på same tid var klart at Åkra vann 12-0 heime mot Voll, var opprykket så fjernt det kunne få blitt.
Artikkelen held fram under annonsen.
Men med tre mål på overtid, det siste på på straffe i 95. minutt gjekk det vegen for Endre Eide, André Helland og resten av Djerv 1919. Korleis det var, forklarar Endre Eide best på eigen hand.
– Det er det villaste eg har vore med på. Du trur jo verken det du ser eller høyrer. Vi ligg under 2-0 i 90. minutt og scorer tre mål på overtid. Tre mål. Det skal jo ikkje gå. Nei, no er det heilt gale her. Folk står i berre boksaren og jublar. Det er det sjukaste, seier Endre til Grenda.
Og no vert det sjølvsagt feiring.
– Vi droppar treninga i morgon og går ut for å feira med stil, sluttar Endre.