Vann frukt- og grøntkonkurranse

Eurospar Rosendal vann nyleg ein frukt- og grøntkonkurranse i Eurospar-kjeda, region Sør-Noreg. Det blir premiert med ein studietur til Alicante i mars for to personar frå butikken i Rosendal.

– Dette er veldig kjekt! Eg trudde ikkje vi hadde sjansen til å vinna, for det er konkurranse mellom så mange gode butikkar med flinke folk, seier Monica, som er ein av dei heldige som får ta turen til Spania for mellom anna å sjå kor appelsinane ho sel vert dyrka.

Monica og dei andre Eurospar-tilsette vert dermed premiert for andre gong for å ha ei attraktiv frukt- og grøntavdeling. Førre gong fekk Monica reisa til London då Eurospar Rosendal vart kåra til årets frukt- og grøntbutikk i ein konkurranse mellom alle dei store kjedene.

– Då eg var til London var det hardt program, men det var utruleg kjekt, seier ho.

 

Utan konkurranseinstinkt

Ei langhelg i Spania midt i den kalde årstida i Noreg er ikkje å forakta, men ho reknar med det vert eit travelt opplegg. Ho håpar likevel det vert tid til eit lite bad.

– Då han frå Bama var her før jul sa han at eg berre kunne pakka bikinien, men det trudde eg ikkje på. Men no får eg kanskje sjansen til å bruka han, smiler den alltid blide dama.

Målingane på sal av frukt og grønt byrja i veke 13 i fjor, og heldt fram til nyttår, som eit ledd i kjeda sitt mål om å selja meir frukt og grønt til kundane sine.

– I nokre periodar var målet å selja mest mogleg bær, andre gonger var det avokado eller andre produkt. Så såg eg plutseleg at vår butikk vann fleire delmål. Då byrja eg å tenkja at vi hadde ein sjanse likevel. Eg tenkte ikkje noko vidare over det, men har no prøvd å setja fram litt ekstra jordbær her og litt ekstra avokado der, og då året var slutt viste det seg at vi var best. Eg eig ikkje konkurranseinstinkt, så det er litt moro at vi vinn, ler ho.