– Uttale til temaplan reiseliv og cruisestrategi

Syner til ovanståande planutkast og leverer med dette ein uttale:

 

Generelt

Det er svært positivt at planane byggjer på FN sine berekraftsmål og søkjer å byggja dette inn i konkrete planar og tiltak.

 

Cruiseturisme

Det kan vera nærliggjande å samanlikna cruiseturisme med ein dyrehage; publikum betaler ein billett og går rundt og ser på dyra i bur og innhengingar. Visjonen om utsleppsfri destinasjon og høg lokal verdiskaping er ikkje råd å gjennomføra også med maks 600 passasjerar. Målet i planen vert difor urealistisk fordi denne type masseturisme ikkje kan verta berekraftig, ikkje kan gje høg regional verdiskaping og har lite god ivaretaking av lokalsamfunnet.

Cruiseturistar besøker ei rekkje hamner i Noreg. Dei har betalt for turen, får alt dei treng om bord og legg lite att der dei kjem i land. Storleiken på skipa har kanskje ein betydning, men erfaring frå sist sesong med kapasitet ca. 120 passasjerar pr båt, syner at dei ikkje kjøper varer og tenester i særleg grad. Det er hyggjeleg å gå på land og sjå på natur og kultur – det er jo difor dei har kjøpt billetten.

Det er fleire forslag til løysingar i planen, ikkje alle heng godt saman. Det hjelper lite om passasjerane må gå 500 meter til parkerte bussar når dei same bussene er henta inn frå stasjonar rundt i distrikt og nabokommunar.

Ved oppstart av den moderne cruiseturismen, kjøpe reiarlaga lokale tenester til god pris. No er tenester og opplevingar prismessig pressa ned og det er mengda som kan gje eit utslag lokalt. Dette er masseturismen sitt dilemma. Difor må ein søkja å finna andre former og løysingar som t.d.

• krav om minst 3 døgn opphald

Artikkelen held fram under annonsen.
• maks 100 passasjerar pr båt
• avgift på kr 100 pr passasjer (alt. ved 600 passasjerar og 1 døgn) som vert fordelt til alle aktørar som har aktivitetar retta mot cruiseturistane)
• Kvinnherad bør ta på seg ei leiarrolle for å få til eit samarbeid med Hardangerkommunane der målet er ein utsleppsfri Hardangerfjord (à la Geiranger) innan 2027(?).

Ved 3 døgns opphald vil passasjerane søkja aktivitetar og deltaking - det vert for kjedelig å liggja i ro. Ved maks 100 passasjerar er tilhøva rimeleg gode for å skipa til aktivitetar som gjev lokal verdiskaping.

 

Temaplan for reiseliv

Viktig sitat frå planen:

«Fram mot 2050 skal brorparten av veksten i norsk reiseliv bestå av unike opplevingar som er ei reise verd i eit intakt natur- og kulturlandskap. Transport til og frå reisemålet skal vere mest mogleg klima- og miljøvenleg. Reiselivsnæringa skal, i eit tett samspel med det offentlege og andre sektorar, søkje etter og vere kjenneteikna av grøn verdiskaping.»

Naturen og kulturen er viktigaste fundament i utvikling av reiseliv. Folgefonnkommunane deltok i rundt 2010 i utviklingsprogrammet «Naturen som verdiskapar» organisert av Direktoratet for Naturforvaltning. Tilsvarande prosjekt var også «Kulturen som verdiskaper». Dei to prosjekta inneheld mange nyttige idear. Parkeringsplass på Bondhus og opprusting av Bondhusdalen med toalett, rasteplassar og skilting er eit eksempel. På kultursida er Kammermusikkfestivalen i Baroniet eit godt eksempel på lokal verdiskaping.

Kap. 12 Tiltaksplan og budsjett inneheld mange gode idear. Marknadsføring og samordning/ samhandling/finansiering er avgjerande for gjennomføring. Her er nokre idear i tillegg:

• utgreia konseptet for europeisk vandreturisme slik det artar seg i Mellom-Europa.
• Ridehallen i Rosendal er ikkje nemnd, den har potensiale for utstillingar, utleige av hesteplass for tilreisande, kursverksemd, etc. Valen Rittel og Smiedalen Aktivitetsferie er heller ikkje med. Hesteinteressen er stor i landet og det er mykje pengar knytt til dei rette tilboda.
• Kvinnherad har historiske og unikt kyrkjelege attraksjonar som Fjelberg prestegard, Halsnøy Kloster, Malmanger prestegard, Kvinnheradkyrkja og Æneskyrkja. Det er aukande interesse for pilegrimsturar og her er attraksjon som kan knytast saman.
• Aktiv turisme og kunnskapsturisme er aukande. Eit samarbeid mellom Folgefonnsenteret, Skinnarbu og Eidfjordsenteret omkring dyreliv, reinsstamma på Hardangervidda, geologi og klima kan utgjera eit besøkskonsept. Det bør etablerast kontakt mellom dei 3 sentra for å utgreie dette. Her kan det også liggja statlege midlar.
• Bruk av lokal infrastruktur i turisme, er til stor gagn for lokalsamfunna. I dag er det ingen samordning eller pakke som gjer reise frå Bergen til Rosendal, vidare til Ullensvang, vidare til Kvam eller Voss med eller utan overnatting og attende til Bergen. Det er «Hardanger i eit nøtteskal».

Artikkelen held fram under annonsen.
• Rosendal har ein Putball-bane, Husnes ein golfbane - begge er aktivitetar som tiltrekker turistar. I nyare til er også Frisbee-golf populært og kan organiserast til dei to anlegga.
• Skipsbygging har vore sentral aktivitet i hundrevis av år. Kvinnherad har no eit kystkultursenter på Sunde og Gurine i Rosendal. Her vil det vera mogeleg å utvikla aktivitetar.
• Kvinnherad bør jobba for flest mogleg av turistane nyttar kollektivsystemet som allereie finst, noko som vil gagne både miljøet og sikre at kollektivtilbodet vert satsa på (Travel like the locals).

Det er mange kjelder til økonomiske utviklingsmidlar og tiltak. Den kommunale økonomien er ikkje god og det er vanskeleg å få løyvingar over årsbudsjetta. Difor bør Kvinnherad ta midlar som vert tildelt frå Havbruksfondet eller overskot på Kraftfondet og etablera eit fond på t.d. 15 mill. som kan nyttast til eigna prosjekt.

«Kvinnherad tilbyr unike reiselivsprodukt basert på natur og kultur i verdsklasse.» er eit ambisiøst mål som krev både nytenking, økonomi og entusiastiske menneske!

 

Svein Opdal

Miljøpartiet dei Grøne