Utstillingsopning i Ølve

Laurdag 6. juli opnar utstillinga «Spor i Berg» av fotograf Oddleiv Apneseth. Ei utstilling om gruvebygda Ølve.

Fotograf Apneseth har dokumentert spor etter bakstehellebrot og gruvedrift i Ølve.

– Bileta hans er basis i utstillinga som fortel om ei 900 år lang bergverkshistorie på nordsida av Hardangerfjorden, heiter det i pressemeldinga.

Utstillinga opnar i Banken ved Dalsjøen i Ølve klokka 15.

 

Eldste gruvebygda

Ølve er den eldste gruvebygda på Vestlandet med gruvedrift fleire periodar frå 1642. Eit koparverk kom i gang i 1647, med smeltehytte på Slagget. Frå 1860-åra handla det om å produsera svovelkis for eksport til industrien i Europa. Den drifta vart avslutta i 1919, og etter ny prøvedrift i eit år i 1957 var det slutt for godt.

– Endå eldre er produksjonen av baksteheller. Frå 1000-talet, gjennom heile mellomalderen og til ny tid vart det hogge heller for utskiping frå Fuglebergsåsen i Ølve og Netland på Hatlestrand. Ingen annan stad i landet blei det produsert fleire slike runde steinheller av klorittskifer til å steikja mat på, seier Eva Røyrane.

 

Funne restar

Restar av baksteheller frå Ølve er funne blant anna ved utgravingar i dei norske mellomalderbyane.

– I Fuglebergsåsen ser vi spora etter hellehoggarane i form av meir enn femti små og store hellarar, store avfallsdungar framom desse og ein utskipingskai som fortel om transportvegen, fortel Røyrane.

Apneseth sine bilete viser hellebrota slik dei ligg i dag, korleis det ser ut inne i dei nedlagde gruvegangane og korleis landskapet i Dalen og Attramadal er prega av gruvedrift gjennom fleire hundre år.

 

Vandreutstilling

– Det er kulturnemnda i Ølve bygdelag som har produsert utstillinga med tilskot i form av SMIL-midlar, ei gåve frå Sparebank 1-stiftinga Kvinnherad og kulturmidlar frå Kvinnherad kommune, opplyser Røyrane.

Utstillinga blir ståande i Ølve til midt i september for at skuleklassar skal kunna koma på omvising. Etter den tid skal utstillinga på vandring, blant anna til Moster Amfi.