Utset sesongstarten i langrenn

Hadde vêret spelt på lag skulle kommunen sine langrennsløparar staka i gang sesongen i Fjellhaugen søndag føremiddag. Slik ser det ikkje ut til å bli.

– Når kikkar ut vindauga no i dag så ser det ut til at vi må avlysa rennet, seier Tommy Søllesvik frå Omvikdalen IL onsdag.

Det betyr at det klassiske skirennet som skulle gått av stabelen i Fjellhaugen søndag, og markera startskotet på skikarusellen 2020, truleg vert flytta fram som avslutningsrenn 28. mars.

– For å seia det slik, det skal skje eit lite under om det skal bli skirenn i helga, seier han og legg til:

– Vi har gått på ski der oppe både måndag og tysdag, og vi har ein liten flekk der det er snø. Men ein må opp på toppane for å gå. Då blir det tungvint å arrangera skirenn utan straum og varm saft, det skal jo vera kjekt dette her, seier Søllesvik.

Skulle det plutseleg snu og forholda bli gode, så kastar arrangøren seg rundt.

– Skulle det skje eit under så kastar vi oss rundt. Men alt tyder på at det vert ein forseinka start på skikarusellen. Såpass pessimistisk er eg, seier han.