Trippel med julekonsertar

Røysterett for Alle førebur seg på ein trippel med julekonsertar i starten på desember.

– Julekonsertane i fjor vart så vel mottekne, at me satsar endå sterkare i år. Me ynskjer å gje tilhøyrarane ei fin adventsstund i kyrkja; song- og musikkglede er hovudfokus. Som i fjor, vil me også denne gongen spe på med krefter utanfrå til eigne innslag, skriv Røysterett for Alle i ei melding.

Koret legg opp til tre sjølvstendige julekonsertar i år 1. desember i Husnes kyrkje, 5. desember i Uskedal kyrkje og 12. desember i Ølve kyrkje.

 

Om ungdomskor

Røysterett for alle har også gjort seg nokon tankar om rekrutteringa til kora.

– Song som fag i grunnskulen er teke ut av undervisningsplanen, noko som har uroa mange når det gjeld kva dette kan leia til når det gjeld vedlikehald av songinteressa hjå den oppveksande slekta. Trenden i korlivet på bygdene er stort sett at snittalderen i kora har vorte høgare og høgare med åra. Ein kan frykta at denne trenden vil verta sterkare med mindre vekt på song og songglede i skulen, skriv koret.

Dei fortel at styret i Røysterett for Alle har vorte kontakta direkte og indirekte frå interesserte foreldre med spørsmål om dei kan tenkja seg å få i stand eit ungdomskor eller aspirantkor.

– Me har ikkje ressursar til å driva noko slikt i tillegg til koret me driv. Kan henda ville eit slikt tiltak kunna gje ein kveik der interessa ser ut til å vera dalande. Me har lufta tanken med leiarane for to andre kor, og dei er samde i at eit slikt initiativ kunne verta positivt for rekruttering blant dei yngre. Kulturskulen er òg kontakta om desse tankane. Signalet derifrå er at dei ser positivt på eit slikt tiltak, og kan leiga ut dirigent. Dersom initiativtakarane har ynskje om ein særskilt dirigent, let dette seg ordna, med atterhald om at den ynskte dirigenten er viljug til å ta på seg jobben, skriv dei.

 

Rekruttering

– Det må strekast under at ungdomskoret ikkje er tenkt som eit aspirantkor for Røysterett for Alle, men må sjåast på som eit kor av ungdomar som kan verta eit grunnlag for rekruttering for alle kora i Kvinnherad. Røysterett for Alle kan berre tilby øvingslokale og dirigent Maria Malmsten, som er tilsett i Kulturskulen. Ho har blitt kontakta direkte av foreldre med spørsmål om ungdomskor, og ser svært positivt på ei slik utfordring. Styret i Røysterett for Alle ynskjer å kunna hjelpa til med de me har av kunnskap om lagsdrift, og er opne for samarbeidsprosjekt og liknande, klargjer dei.

Det blir lagt til at ungdomskoret må ha eige styre, samansett av dei føresette, og det er dei som må leggja opp korleis dei vil organisera seg.