Trippar etter å koma i gang

I dagane fram mot opningskonserten til Rosendal Kammermusikkfestival går Leif Ove Andsnes rastlaus rundt og ventar på å få møta dei andre kunstnarane.

– Det er alltid nokre merkelege dagar i forkant av festivalen. Å vera verten gir alltid nokre ekstra oppgåver og ansvar, så det skal bli godt å koma på plass i Rosendal og koma i gang, seier Andsnes på telefon frå Bergen.

Med seg til årets festival tar han kring 20 ulike musikarar, som saman skal gjennom 11 konsertar med musikk frå rundt 30 komponistar.

 

Høg på adrenalin

Musikken som blir presentert har det til felles at han er skapt i krigsåra 1914 til 1918.

– Målet mitt er å visa mangfaldet i perioden. Det er ikkje berre krigsmusikk, og konsertane blir ikkje prega av det. Komponistane brukte alle fargane i paletten då dei skapte musikken, og det blir musikk som trassar krigsstemninga meir enn å gå inn i han. Men krigen prega liva til komponistane, og fleire av dei vart sende i krigen, forklarer Andsnes.

Det er mykje musikk å førebu før festivalen tar til.

– Eg har prøvd ut litt av stoffet i løpet av festivalar denne sommaren. Det er ikkje tvil om at denne festivalen fører til at eg utvidar horisonten min. Eg har allereie lært mykje om temaet for festivalen, meiner pianisten.

Sjølv kjem Andsnes til å spela på seks av konsertane, men han vil likevel få med seg alle 11.

– Det blir travelt på oss. Timeplanen er full, kvar einaste halvtime er booka. Eg veit eg kjem til å vera høg på adrenalin gjennom heile festivalen, og så kjem eg til å kollapsa heilt kjempesliten på måndagen. Slik er det alltid. Det er sett av tid i timeplanen til det også, ler han.