Trio vann lokaloppgjeret
Allkan Abdulla si scoring frå straffemerket vart kampens einaste då Halsnøy tok i mot Trio til treningskamp fredag kveld.
Dei som hadde teke turen til kunstgrasbanen på Halsnøy denne kvelden fekk ein liten forsmak på det som ventar i 5. divisjon denne sesongen.
Heimelaget var på frå start og utnytta gong på gong at Trio slurva stort i oppspelsfasen. Men trass i at blåtrøyene fekk servert enorme målsjansar og ved fleire høve kom åleine med keeper, gjekk laga mållause til pause. Noko eit uvanleg upresist bortelag kan takka keeper Eirik Eikeland for.
Artikkelen held fram under annonsen.
I andre omgang fekk raudtrøyene til Aleksander Ekeland luka vekk dei styggaste feila og spelte seg til fleire gode scoringsmoglegheiter. Men det ville seg ikkje i ope spel, og det måtte eit straffespark til for å få ballen i mål.
Allkan Abdulla var sikker då han fekk sjansen frå ellevemetersmerket, og scora kampens einaste mål i Trio sin 1-0-siger.