Trekte fullt hus i Bergen
Bileta til Trude Hisdal trekte fullt hus hos Kunsthuset Wendelboe i Bergen under opninga torsdag ettermiddag.
– Dette er kvinnedagen, klokka er tre, og det skal eigentleg vera umogleg å få folk til å koma. Men dette er Trude Hisdal sin dag, og de har gjort det mogleg, sa gallerist Egill Wendelboe Aarø til minst 70 personar som fekk med seg den offisielle opninga i galleriet på Engen, like ved den Nationale Scene.
Kunstnaren har ei brei kunstutdanning, og er kjend for å skapa fargesterke, detaljerte, blomstrande og magiske motiv som på ein spanande måte balanserer mellom realisme og draum. Hisdal bur og arbeider i Rosendal, og målar akryl på lerret i ulike format. Utstillinga i Bergen er den femte separatutstillinga hennar, men ho har også vore med på diverse fellesutstillingar. Utstillinga hadde fått tittelen «Natt under åpen himmel», etter eitt av dei aller nyaste måleria til Hisdal.
– Opnar for det magiske
Den offisielle utstillingsopninga starta med at galleristen presenterte kunstverka hennar.
– Kvart bilete fortel nærast ei novelle, eller kanskje ei mykje større historie. Og eg har ikkje forstått alt. Men dette er kvalitet. Og kunstnaren er her i dag, så nytt sjansen til å snakka med henne, sa Wendelboe Aarø.
Pianist Bjarne Øymyr og songar Åse Jakobs stod for den musikalske biten, og spela blant anna ein jazza versjon av «Summertime». Diktaren Bente Bratlund stod for det poetiske innslag under opninga. Ho hadde også nokre ord direkte til kunstnaren:
– Eg synest det var ein fantastisk tittel på denne utstillinga. «Natt under open himmel». Det er ein tittel som opnar opp for det vakre, for draumen og magien. Og er det noko vi menneske treng i dag, så må det vel vera dette. Det vakre. Draumen. Magien. I bileta til Trude finn eg alt dette. Gjennom fargar som rører ved sansane. Gjennom motiv som gjev rom for draumar. Og så det som ligg bak, og kan opna for det magiske.
Utstillinga står berre eit par veker til, og meldinga frå galleristen er klar.
– Bileta må opplevast, oppmodar han.
