Vonar på snarleg forlenging

I desember bestemte kontaktutvalet for Kvinnheradpakken å nytta ein liten del av potten for trafikksikringsmidlar til å fullføra gang- og sykkelvegen i Neslia inn til nedkøyrsla til det inste byggjefeltet. Sidan den gong har det ikkje skjedd noko som viser att i terrenget. På torsdag spurde Grenda difor sektorleiar Sigbjørn Øye om status for prosjektet.

– Planen var at dette skulle vore gjort i mai. Saka står der at vi ventar på svar på dispensasjonssøknaden frå byggjesaksavdelinga. Vi har fått tilbakemelding om at den ikkje blir behandla før grunnavtalane er på plass. Men vi er munnleg samde med Neslia Øvre, så dette er i ferd med å ordna seg, fortalde han, og la til at arbeidet kan skje snarleg.

Etter det Grenda forstår vart grunnavtalane signerte på fredag. Forlenginga av gang- og sykkelvegen er kostnadsrekna til mellom 1,5 og 2 millionar kroner.