Testar ut ladinga på ferja

Då dei nye ferjekontraktane tredde i verk ved nyttår, var ikkje anlegga for elektrisk drift heilt klare. Ferjene til Fjord1 har difor sigla i lengre tid enn planlagt med dieseldrift. Men reisande på sambandet Årsnes-Gjermundshamn den siste tida har kanskje lagt merke til at ferja no har kopla seg til ladestasjonane.

– Ja, det stemmer. Vi er så smått i gang om oppstartfasen. Vi ladar på nokre avgangar, fortel regionleiar Geir Vangen i Fjord1 til Grenda.

Kor tid det vert full elektrisk drift avheng sjølvsagt om det dukkar opp noko uføresett under testinga.

– Når vi nærmar oss starten av juni, så skal vi ikkje vera så langt unna, men det gjenstår enno litt arbeid. Det er trass alt ein ganske komplisert operasjon å få dette til å fungera, seier Vangen.

Fjord1 sitt andre samband i Kvinnherad, Ranavik-Skjersholmane, har gått med elektrisk drift ei god stund allereie.

– Der er vi stort sett ferdige med testfasen. Anlegget fungerer som planlagt, og er ganske stabilt og godt, slår Geir Vangen fast.