Startar opp igjen arbeidet på Haukelifjell: – Planlegg turen og førebu deg på venting
15. juni startar tunnelarbeidet på E134 Haukelifjell opp igjen for fullt. Det medfører også kolonnekøyring og trafikkregulering fram til 15. oktober.
Publisert
Sist oppdatert
Statens vegvesen startar sin andre sesong på oppgraderinga av tunnelane på E134 over Haukelifjell 15. juni.
– I år blir det arbeid i Vågslid- og Haukelitunnelen, i tillegg til arbeid utanfor Svandalsflona rasoverbygg, skriv Statens vegvesen i ei pressemelding.
Annonse
I fjor var det ein auke i trafikken på E134 Haukelifjell med ti prosent samanlikna med året før. På grunn av pandemien og ei klar oppmoding om å feriera i Norge, ventar vegvesenet minst like mykje trafikk denne sommaren.
– Vi oppmodar difor trafikantane til å planlegga turen og førebu seg på litt venting. Det er ikkje mogleg å seia noko om korleis trafikken blir, men vi tek høgde for at det kan bli rundt éin times ventetid, står det å lesa i pressemeldinga.
Tips frå vegvesenet
Vegvesenet har difor laga ei punktvis liste med tips om korleis ein best kan førebu seg:
Annonse
* Planlegg turen. Reis gjerne tidlegare på dagen. Trafikken er erfaringsmessig størst frå 12-tida og eit godt stykke utover dagen.
* Vær tolmodig, ta deg god tid.
* Ta med ekstra mat og drikke.
* Nyt ein vakker fjellovergang.
* Følg beskjeden frå trafikkdirigentane.
* Køyr forsiktig og hald avstand.
