Samband stengt grunna skade på ferjelem

Klokka 13 kom meldinga om at ferjesambandet Årsnes - Gjermundshamn er stengt inntil vidare. Fjord1 melder også om omkøyring via Tørvikbygd - Jondal, kor det heldigvis går to ferjer i sambandet no i sommar.

– Det ser ut som det har skjedd noko med sylinderen på eine sida av ferjelemmen, for heile lemmen ligg nedi sjøen. No har alle bilane byrja å snu og setja nasa mot Årsnes, fortel Lars Kristian Ekeland frå kaikanten på Gjermundshamn.

Han er på jobb på gatekjøkkenet Snacksen i dag, og merka at ferja ikkje la inntil som normalt.

– Eg har snakka med folk som høyrte eit smell, men om det var fordi ferja trefte lemmen for hardt eller om noko har skjedd før ferja kom inntil kan eg ikkje seia. Ferja køyrer no til Tørvikbygd, sidan ho hadde bilar ombord som skal til denne sida av fjorden, opplyser Ekeland.