To lokale forfattarar på eksklusiv topp 10-liste

Marius Tveit Nissestad

Marius Tveit Nissestad

marius@grenda.no

Publisert: 6. november 2019, 12:00

Anders Totland og Tor Arve Røssland har begge skrive ei av dei ti beste nynorske ungdomsbøkene i dette årtusenet.

Som ein del av Bokåret 2019 har Nynorsksenteret, Pirion og Framtida.no teke initiativ til å kåra dei beste ungdomsbøkene på nynorsk etter år 2000. Og etter å ha fått inn forslag frå ungdom frå heile landet, har juryen no konkludert med kva ti bøker som faktisk er dei beste. Inne på lista er både «Engel i snøen» av Anders Totland og «Glimt» av Tor Arve Røssland.

– Det er mange gode nynorske ungdomsbøker og vanskeleg å velja ut berre ti bøker. På lista har vi fått ei breidde i sjangrar med både fantasy, grøssar, sjøroman, historisk roman, novellesamling og andre. Dette seier kanskje noko om at ein no finn ei stor breidde i den nynorske ungdomslitteraturen, seier Liv Kristin Bjørklykke Øvereng til Framtida.no.

 

Uhyggeleg og spanande

Ein jury som skriv dette om dei to innslaga frå Kvinnherad på lista:

– Denne grøssaren går føre seg på to ulike tidsplan: andre verdskrigen og i dag. Etter kvart byrjar det å skje skremmande og uforklarlege ting i notidsforteljinga. Kan dei vera knytte til det som hender under krigen? «Glimt» er ei spennande og uhyggeleg bok.

– Vakker og sterk roman om ungdom med kreft, og kor brutalt og kontrastfylt livet kan vera. Denne boka vert ståande lenge, fordi ho tek unge menneske på alvor. Boka er lågmælt og varm, og skildrar vennskap og samhald som lyser opp sjukehuskorridorane.

 

Dei ti beste nynorske ungdomsbøkene etter år 2000: 

  • Glimt av Tor Arve Røssland
  • Engel i snøen av Anders Totland
  • Smadra av Brynjulf Jung Tjønn
  • Jag är Supermann av Lars Mæhle
  • Inn i elden av Aino Basso
  • Arrfjes av Terje Torkildsen
  • 12 ting som må gjerast før verda går under av Bjørn Sortland
  • Fengsla av Hilde K. Kvalvaag
  • Søkeord: Ayotzintl av Marit Kaldhol
  • Drakeguten av Asbjørn Rydland