Tilbake frå sjukdom med pallplass

Sjukdom har sett Ragnhild Femsteinevik på sidelinja så langt denne sesongen. Denne helga var ho tilbake i sporet og sikra seg pallplass i norgescupen.

Marius Tveit Nissestad

Marius Tveit Nissestad

marius@grenda.no

11 januar, 2018

Etter det ein kan kalla ein mislykka normaldistanse på laurdagen, med fem bom og 16. plass, løfta Ragnhild seg betrakteleg då ho på søndagens sprint fekk stilt inn siktet og kjempa i toppen frå start til slutt i Lygna-løypene. Men sjølv om ho gjekk ut i tet etter siste skyting, måtte jenta frå Hatlestrand ta til takke med bronse på sprinten. Fattige 13 sekund bak Maren Wangensteen frå Vestre Slidre IL.

Storebror Martin var òg i aksjon i Oppland. Likeins med Ragnhild fekk han det tøft på standplass under laurdagens normaldistanse. Også han måtte sjå at totalt fem blinkar vart verande svarte etter fire skytingar, og kom i mål som nummer tolv. Men revansjelysten og i strålande langrennsform slo også han tilbake dagen etter. Trass tre bom på standplass kryssa han mållinja som nummer to, 41 sekund etter Øystein Ulekleiv frå Dombås IL.