– Tidenes julegåve til lokalsamfunnet!

Det skriv ordførar Peder Sjo Slettebø i ei pressemelding etter gledesnyhende frå Hydro Husnes i dag tidleg.

 

– Vi har i dag fått tidenes julegåve til lokalsamfunnet. Endeleg kom nyhenda eit heilt lokalsamfunn har venta så lenge på. Hydro kunngjorde i dag at styret i selskapet har vedteke oppstart av B-hallen. Avgjerda markerer starten på ei ny og ljosare tid for Kvinnheradsamfunnet, skriv Slettebø innleiingsvis i pressemeldinga som har fått tittelen «gratulera med dagen Kvinnherad!».

Han peikar vidare på at det sidan B-hallen vart stengd i 2009 så har det vore krevjande tider i Kvinnherad.

– Særleg krevjande var det for alle tilsette ved aluminiumsverket, som lenge måtte leva i uvisse om eige framtid. Ein slik situasjon er vanskeleg å stå i, og reduksjonane ved dåverande Sør-Norge Aluminium prega heile lokalsamfunnet, skriv ordføraren.

 

– No går det berre oppover

Han peikar på at framtidsutsiktene i aluminiumsindustrien var annleis då enn no, og at Hydro satsar på 100 nye år i Norge.

– I dag er det mange som fortener stor takk. Særleg vil eg takka leiing og tilsette ved Hydro Husnes som i samarbeid klarte å sikra drifta ved verket på Husnes. Denne jobben var svært tøff, og dei gjorde den ikkje berre for eigen arbeidsplass, dei gjorde den for heile Kvinnheradsamfunnet. Dette skuldar vi dei stor takk for, skriv han.

Og dagens gladnyheit er noko ordføraren meiner kvinnheringane har fortent.

– Vi har klart oss gjennom tøffe tider. I dag kan vi sjå oss attende og slå fast at vi klarte oss gjennom det. Nok ein gong gratulera med dagen. No går det berre ein veg, og det er oppover, sluttar Slettebø.