Terje sine beste Fantasy-tips

Morten Nygård

Morten Nygård

morten@grenda.no

Sist oppdatert: 7. august 2019, 16:14

Om du skal hevda deg i Grenda-ligaen i Fantasy, kan det vera vel verdt å lytta til Terje Bru Markhus sin råd.

 

Terje Bru Markhus frå Valen er i det sivile dagleg leiar hjå Spar Valen. Men 35-åringen er også ein ekspert når det kjem til Fantasy-fotball. Han har vore med sidan farsotta nådde Norge for kring 10 år sidan, og stiller med lag både i den norske Eliteserien og engelske Premier League.

– Det har blitt meir og meir dei siste to åra, og no brukar eg kanskje litt for mykje tid på dette, smiler han.

I fjor vart han nummer 2 i VG sin landsdekkande Fantasy-konkurranse om norsk fotball, noko som gjorde at han føre årets sesong vart headhunta av SK Brann for å levera tips til kvar serierunde i år.

– Det har gått greitt så langt, seier han om treffprosenten.

 

City og Liverpool

Når det gjeld Premier League er hans beste plassering nr. 10.500 i heile verda, noko som er svært sterkt med tanke på at nærare 6 millionar lag var påmeldte. Kva kan så Terje røpa av gode tips føre fredagens seriestart?

– Dei som er sikre på laget mitt til helga er Sterling (Manchester City), Salah, Alexander-Arnold og Robertson (Liverpool). I tillegg vil eg ha med King (Bournemouth).

– Kvifor?

– Dei tre frå Liverpool var solide defensivt i fjor, dessutan kjem dei til så mange innlegg at det blir poeng av det. Sterling og Salah er vel dei beste av dei dyre spelarane, seier Markhus.

– Kva med Harry Kane (Tottenham) då?

– Jo, han kan scora tre mål i helga, så det kan vera eg må byta han inn for Sterling eller Salah.

Terje Bru Markhus tippar Manchester City og Liverpool kjem til å gjera som i fjor og dominera på tabellen. Han meiner difor det er fornuftig å ta med tre spelarar frå City, og kanskje også tre frå Liverpool.

– Men City har ein stor stall, så det kan bli litt roteringar. Likevel bør ein ha tre derifrå, meiner eksperten.

 

Billege spissar

Kva så med formasjonsvalet?

– Tidlegare brukte eg mykje 3-4-3 med eit ganske dyrt forsvar og ein veldig dyr midtbane. No lurer eg på å leggja om til 4-4-2 med to billege spissar, avslører Markhus.

Utover City og Liverpool, reknar han med at Tottenham vert å finna i toppen. Men når det gjeld den ettertrakta 4. plassen trur han kampen vert tøff.

– Eg har mest tru på Arsenal, United eller Everton. Chelsea kan fort få ein nedtur, for det blir tungt å erstatta Hazard når dei ikkje kan kjøpa spelarar, seier Terje, som også er usikker på dei ferske managerane Solskjær og Lampard. Og det seier han sjølv om han er ihuga United-fan.

Generelt tilrår han å følgja med på ulike Twitter-kontoar og podcast, mellom anna for å finna ferske lagoppstillingar.

– Eg gler meg veldig til Premier League byrjar. Det er ikkje heilt det same utan engelsk fotball på tv, seier Terje Bru Markhus, som òg gler seg til å følgja med på Grenda-ligaen, der han er påmeldt med laget T-Bones.