Tapetserte pallen på heimebane – sette ny norsk rekord

Kvinnherad bogeskyttarklubb dominerte resultatlistene då dei inviterte til nasjonalt bogeskyttarstemne på Sunde denne helga.

Saman med skyttarar frå Bergen bueskytterklub, Hardanger bogeklubb og Stord bueskyttere, feira bogeskyttarane frå Kvinnherad fyrste advent i gymsalen på Sunde. Det gjorde dei med å konkurrera i 60-pilsstemne frå 18 meter.

Sjølv om bogeskyttarane frå Kvinnherad var vertskap, var dei ikkje særleg gjestfrie i konkurransen. For dei lokale skyttarane tapetserte like så greitt pallen i klassen instinktiv.

På topp kom Terje Bakke med 536 poeng, etterfølgt av Hans Einar Holmedal med 526 poeng og Frank Johnsen og hans 516 poeng.

– Med eit samla resultat på 1578 poeng betra dei sin norske rekord i lagskyting med seks poeng, skriv laget i ein pressemelding.

I tillegg til det gjekk Kristianna Øvrehus til topps i rekruttklassen i instinktiv med 424 poent, medan Atle Helland vann compoundklassen med 574 poeng.