Må høvla av 7 cm asfalt:

Sykkelplanar endra i siste liten

Håvard Sætrevik

Håvard Sætrevik

haavard@grenda.no

Publisert: 20. mai 2020, 17:28

– Det er kjedeleg for oss, og betyr at me må vinka farvel til rekordplanane.

Det seier Kjetil Mehl etter at det vart klart at asfaltleverandøren til Rosendal stadion hadde vore altfor raus med massen dei la i førre veke. Onsdag starta dei på jobben med høvla opptil sju centimeter somme stadar på banen.
– Det er ein keisam feil, men det går ikkje utover framdrifta på prosjektet, seier Atle Søllesvik i Dimmelsvik Entreprenør, som har prosjektet.
For Kjetil og Vidar Mehl betyr det at dei må endra planane for sykkelmaraton i 24 timar på kort varsel.
– Me har funne ei alternativ løype i Omvikdalen i staden. Det blir start på tunet hos oss (Brødskreppa, red.merk), opp til Landa, ned mot skulen og over Hjelmeland til Tveito. Runden blir 5,6 kilometer, og me får mellom 50 og 60 høgdemeter å ta oss av, forklarer Kjetil, som syns det er synd at rekordskjemaet må leggjast bort.

Sykkelmaratonet  blir gjort av brørne for å samla inn pengar til kreftforeininga og slagforeininga.

Opptil sju centimeter for mykje asfalt var lagt på delar av Rosendal stadion. Dermed måtte asfaltleggjaren fresa ned det ferske underlaget.