– Sunnfast – vegen ut av stagnasjon, forgubbing og kommunikasjonsmessig bakevje

Svar til Ivar Vaage

Multiconsult sin 88-siders lange rapport «Sunnfast – en mulighetsstudie» er interessant lesing anten ein er for eller mot det store veganlegget. Sist ute med omtale av rapporten er Ivar Vaage, min gode, gamle nabo frå heile oppveksten min i mitt barndoms paradis, Våge. Ivar er ein svoren motstandard av Sunnfast, noko som òg gjennomsyrer innlegget hans. Eller som ein seier, «som ein viss mann les bibelen», sidan han ikkje har klart å finna ein einaste positiv ting med Sunnfast.

Skal ein byggja ein heilt ny veg i utmarka mellom Pollen og Bjellandsneset, vil det sjølvsagt medføra inngrep i terrenget. Faren med ein slik studie, er at trasear, linjer og brutårn som er teikna i kartet lett blir tolka som om dette er ein vedteken reguleringsplan. Dette er ein studie med trasear teikna på skissenivå utan synfaringar, konsekvensanalysar og høyringar. Derfor vil skrekkeksempla Ivar trekkjer fram som å fylla Bjellandstjødno med stein og leggja vegen gjennom bustadhuset på Opsåsen, vera heilt uaktuelle og uakseptable når ein endeleg plan er vedteken. Slik topografien er på deler av traseen, blir det naudsynt med korte tunnelar heller enn høge skjeringar. Slik nye veganlegg blir bygt i dag, vert det lagt stor vekt på flotte natursteinsmurar og fint planerte tilfyllingar i motsetnad til nye skogsbilvegar der estetiske omsyn er underordna.

Ivar hevdar vegen vil leggja beslag på mykje produktiv skog. Til det kan ein sei at vegen òg vil løysa ut mykje produktiv skog som ein elles ikkje får ut og det på ein veg som toler høgt akseltrykk, som er noko av problemet med å få økonomi ut av skogsdrifta i dette området.

Vidare hevdar han at Vågsmarka og Bjellandsneset for all framtid vil bli øydelagt som tur og rekreasjonsområde. Men vart vestsida av Opsangervatnet øydelagt som tur og rekreasjonsområde då Opsangervegen vart bygt? Snarare tvert imot. Gang og sykkelvegen vert mykje nytta til tur og trim for folk uansett funksjonsevne og bind saman turvegar både utover nesa i vatnet og oppetter åsen. Kva med ein sykkeltur til Bjellandstjødno ein vinterdag når isen er trygg? Eller ein sykkeltur over fjorden og vidare rundt på vegane på Huglo. Så kan ein sleppa ned snøret frå brua på heimvegen sør for Kråkene og prøva fiskelukka.

Sidan flytebrua ligg 10m over sjøen på lavdelen av brua, vil småbåttrafikken kunna kryssa under denne over heile fjorden slik som i dag. Større båtar høgare enn 10m og opp til 45m vil gå i den ca. 300m breie skipsleia på vestsida av Åskesholmen slik denne trafikken stort sett gjer i dag, berre litt lengre vest. Eit alternativ for å få brei nok skipslei, kan vera å sprengja bort ytste skjeret på holmen, men ein kan òg i staden auka lengda på hovudspennet til 450m. Alternativt kan skråstagbrua og skipsleia også plasserast i vest.

Skråstagbrua er av same konstruksjon og får same seglingshøgd, 45m som Helgelandsbrua på Helgelandskysten. Ei svært vakker bru, kåra til vakraste brua i Norge.

Ivar skriv at grunna ureint farvatn i aust i Laukhammarsundet, må ein sprengja bort Kubbholm og Flatøy. Her er ikkje ureint farvatn, men når eit cruiseskip kjem ut av Laukhamarsundet frå vest, vil skipet ha retning mot brua og sjølv med 1km strekning, kan i teorien eit skip som misser styringa kollidera med brua. Derfor er eit alternativ å sprengja ny skipslei i austre enden av sundet, men det er òg andre måtar å hindra ein eventuell kollisjon på. Uansett vil skipa ha svært låg fart gjennom Laukhamarsundet, noko som brua vil bli dimensjonert til å tola ved ein eventuell kollisjon. Når det gjeld å sprengja bort skjer vest i Laukhamarsundet, vil det vera til stor nytte for all skipstrafikk gjennom sundet. Dette området er dessutan utanom den aktuelle marine vernesona.

Så er det gjerne slik at ein ikkje er prinsipielt i mot bygging av store veganlegg i utmark og urørt natur. Ein heiar heller fram eit stort veganlegg nokre mil lengre inn i fjorden der det vil gå med mange gonger meir produktiv skog, med store inngrep i våtmarksområde og vesentleg høgare brutårn. NIMBY-effekten er eit internasjonalt omgrep. «Not in my back yard». Det må gjerne byggjast store veganlegg og gigantiske bruer, berre ikkje i nærleiken der eg bur.

Ja, Kvinnherad treng gode kommunikasjonar, noko som vil forsterka seg radikalt når vegen vert ferjefri mellom Stord og Os. Då vil Kvinherad, dersom me ikkje får på plass Sunnfast eller i det minste, ein kort ferjetur på 10-12 min i same trasse, hamna fullstendig i bakevja i forhold til nabokommunane i vest.

Slik demografi og folketalsnedgang utviklar seg i kommunen vår, er det slik eg og heldigvis mange med meg ser det, heilt avgjerande med raskast mogleg tilknyting til E39 Kyststamvegen.

Spørsmålet er eigentleg: Er freden og ei utmark utan inngrep i Vågsmarka og Bjellandsneset overordna eit Kvinnherad i positiv utvikling der ungdom blir verande og bedrifter finn det interessant å etablera seg?

Sunnfast må på plass – gje gass!

 

Av Håkon Røstbø