Strålande helg for Ragnhild

Marius Tveit Nissestad

Marius Tveit Nissestad

marius@grenda.no

Publisert: 9. mars 2020, 10:38

Ragnhild Femsteinevik gjekk inn til gull på laurdagens sprint i Folldal. I tillegg vart det bronse på fellesstarten.

24-åringen frå Hatlestrand fekk full klaff både i sporet og på standplass på laurdagens sprint. Ikledd det synlege beviset på at ho jamt over har vore norgescupens beste kvinnelege skiskyttar denne sesongen, den gule leiartrøya, tok ho kjapt ansvar på helgas sprint i Folldal.

Og sjølv om det vart ein bom på fyrste skyting, varta Ragnhild opp med såpass fart i sporet at ho etter fullt hus på ståande kunne kryssa mållinja til beste tid. Med det vart det medalje i beste valør laurdag.

Dagen før vart det tre bom på fellesstarten, likevel vart det også her medalje. Ho kom i mål som tredje beste kvinne, 52,2 sekund bak den vinnaren Lotte Lie.