Støy rundt kontroversiell millionavtale

I løpet av romjula i fjor forhandla og signerte Havforskingsinstituttet (HI) og Eide Fjordbruk fram ein avtale om visningskonsesjon med ei ramme på 1,25 millionar kroner. Ein søknad HI-direktøren ikkje kjente til og som styret i Folgefonnsenteret hadde stemt ned ved eit tidlegare høve.

I slutten av desember i fjor signerte Havforskingsinstituttet (HI) og Eide Fjordbruk ein samarbeidsavtale om visningskonsesjon i tilknyting Folgefonnsenteret til ein verdi av 1,25 millionar kroner. Ein avtale som tidlegare var nedstemt av styret i Folgefonnsenteret, men som til det same styret si store forbausing vart godkjent då HI vart tilgodesett økonomisk.

Dette melder iLaks.no over tre artiklar på si nettside denne veka. Dei har nemleg fått innsyn i Eide Fjordbruk sin 29 sider lange visingskonsesjon for oppdrettslag i Hardangerfjorden. Og innimellom desse sidene finst det ein underskriven tilskotsavtale mellom HI og Eide Fjordbruk, datert 27. desember i fjor.

Her står det at HI skal starta førebuingar for og iverksetting av nødvendig arbeid på innhaldet i senteret, og at dei som følgje av det har behov for finansiering. Som motyting skulle Eide-konsernet betala 1.250.000 kroner, kor 250.000 kroner skulle betalast i forkant for godkjenning av konsesjonen. Så skulle det resterande beløpet betalast etter at konsesjonen var godkjent.

 

Endra avtalen

Sidan Hardangerfjorden er i HI si raude sone, der det i dag ikkje blir løyvd produksjonsvekst for oppdretta laks og aure, synest iLaks-journalisten at avtalen var oppsiktsvekkjande. Og tok difor kontakt med HI-direktør Sissel Rogne, som då kunne fortelja at avtalen var endra.

– Handteringa av kontrakten med Eide Fjordbruk er dessverre ikkje ordentleg behandla av oss på Havforskingsinstituttet. Den fyrste kontrakten vart ved ein inkurie signert, noko vi beklagar på det sterkaste, seier ho til iLaks.

Direktøren vart fyrst gjort oppmerksam på dette i mai då Folgefonnsenteret gav beskjed om det.

– Det var problem både med ordlyden og innhaldet i avtalen. Det var ikkje slik vi ville ha den, difor er avtalen endra og oversendt Folgefonnsenteret, seier direktøren vidare til iLaks.

 

Ingen veit

I etterkant av dette har det kome fleire reaksjonar frå ulik hald. Men gjengs i alle reaksjonane er at folk anten ikkje veit eller ikkje vil fortelja iLaks kven som står bak avtalen.

– Eg veit ikkje kven som har forhandla fram avtalen. Det kan eg ikkje veta. Eg veit ikkje, men eg kan jo tenka mitt – kven i HI som har jobba med denne saken, seier Knut Førland, styreleiar i stiftinga Folgefonnsenteret, til iLaks.

– Eg veit ikkje, seier nestleiar Sigrid Brattabø Handeland.

– Eg er varamann i styret i Folgefonnsenteret, og tør difor ikkje å seia det. Ut i frå husfreden i Folgefonnsenteret tør eg ikkje å seia det. Saken er så enormt betent, seier Øyvind Lernes som i følgje iLaks har fått vita kven det er snakk om via Sondre Eide, nestkommanderande i Eide Fjordbruk AS.

– Eg vart forbausa då eg såg konsesjonssøknaden. Litt spesielt at ein aktør i senteret inngår ein avtale for det som senteret sa nei til. HI får eit bidrag, mens Folgefonnsenteret ikkje får noko. Eg trur ikkje nokon i styret i Folgefonnsenteret tør å seia det, om dei visste det, for å behalda relasjonane til partane, seier Lernes vidare.

 

Uheldig

I følgje iLaks er det berre ein person som kan representera både Folgefonnsenteret og HI i samtalane med Eide Fjordbruk. Øystein Skaala er tilsett som forskar i HI og er samstundes deira representant i styret til Folgefonnsenteret.

iLaks.no har også snakka med ordførar Peder Sjo Slettebø, som fortel at dette er ei uheldig sak han og Kvinnherad kommune vil sjå nærare på.

– Det er klart at det ikkje er heldig. Det er viktig at ein no fokuserer på å skaffa inntekter til senteret og ikkje bruker tid på støy som tek fokus vekk frå drifta. Eg har vore på ferie i fire veker no, og har ikkje hatt tid til å ta tak i det konkrete i saken. Eg må ta ei vurdering på kva som er mest hensiktsmessig måte å reagera på, seier Slettebø til iLaks.no.