Det var veldig mange som hadde tatt turen då Vennebyen underhaldt på senteret sin sju-årsdag torsdag ettermiddag.

Storslått Vennebyen-besøk

Med latter, song og dans skapte Apa, Ted og Elfie frå Vennebyen elleville tilstandar saman med sine største fans på Husnes storsenter torsdag ettermiddag.

I god tid før showet starta var senteret fylt til randa av små håpefulle som kribla etter å endeleg få møta heltane sine. Direkte frå Vennebyen, eller som dei sjølv omtalte byen, frå den beste stad på jord, der alle er vener og leikar, entra dei høgt elska figurane scenen ein etter ein. Og då kveldens konferansier trengte hjelp til å ropa fram hovudpersonane sjølve var ikkje barna vanskelege å be.

 

Artikkelen held fram under annonsen.

Viktig bodskap

Med eit breitt smil om munnen klappa, dansa og song barna saman med trioen heile showet gjennom. Med politimannen Apa, ambulansesjåføren Ted og brannmannen Elfie spelar Vennebyen på barna sin fascinasjon for utrykkingsetatane. Dei set fokus på den viktige bodskapen rundt naudetatane, noko konferansieren utfordra barna på.

– Er det nokon som kan telefonnummeret til Elfie og brannvesenet, spurte han publikum.

Ikkje overraskande kom det rette svaret frå eit samstemt barnekor. Dei var heller ikkje vanskelege å be då Elfie ville høyra hugseregla hans.

– Visst det brenner i et hull, ring en- en- null, song barna saman med Elfie.

 

Bestevener

Etter å ha dansa og sunge i ein god halvtime fekk alle som ville koma fram og klemma på favorittpersonane sine. Og det ville dei, alle som ein. I lange køar sto dei så fint og venta på at det skulle bli deira tur til å omfamna anten Elfie eller Apa. Ei av dei mange heldige var Linnea Njaastad Rød (4) som på faren sine skuldrer fekk helsa på elefanten Elfie, ein av favorittane hennar.

Artikkelen held fram under annonsen.

– Det var veldig gøy å dansa med dei, eg har sett dei på iPaden mange gongar før, og ein god del på TV. Det var veldig kjekt å vera her. Faktisk så såg eg dei Bergen ein gong, òg. Dei er veldig kule, og er alle saman favorittane mine. Apa, Elfie og Ted, seier Linnea.

 

Gebursdag for senteret

Vennebyen-arrangementet var eitt av mange denne torsdagen. Senteret feirar nemleg sju år og hadde i det høvet stelt i stand handlefest for kundane. Med lengre opningstider, minikonsert med William Hut og utlodding av gåvekort feira dei seg sjølve til langt på kveld. Feiringa er ikkje ferdig før dei stenger laurdag kveld. Dei som tar turen kan blant anna få med seg trylleshow og diverse musikkinnslag.