Stor konferanse startar i dag

Morten Nygård

Morten Nygård

morten@grenda.no

Publisert: 4. juni 2019, 08:02

Dei neste tre dagane er Rosendal vertskap for den største konferansen som har vore i Kvinnherad nokon gong. Blant deltakarane er Eli Kari Gjengedal, Herborg Kråkevik og Liv Grete Skjelbreid.

Frå 4. til 6. juni vert årskonferansen til Distriktsenergi arrangert i Rosendal. Det er venta 230 utsendingar frå energiselskap over heile landet. Konferansen er lagt hit i samband med at Kvinnherad Energi fyller 100 år i 2019.

I dag står to møte på programmet, begge på Rosendal Fjordhotel. Men på onsdag brakar det laus for fullt, med føredrag heile dagen i Riddersalen på Avlsgården. Møteleiar er Eli Kari Gjengedal. Blant talarane er professor Eystein Jansen frå Bjerknessenteret. Han skal snakka om «Kraftbransjen i eit våtare og villare klima». Vassdrags- og energidirektør Kjetil Lund frå NVE skal også halda innlegg.

På ettermiddagen vert det skipa til utflukt i bygda. Då skal deltakarane vitja Steinparken, Vangssago, Folgefonnsenteret og Baroniet. Det vert lova overraskingar av kulturell og gastronomisk karakter undervegs. Dagen vert avslutta med festmiddag på fjordhotellet. Der skal Herborg Kråkevik syta for underhaldninga. Også Arne Torget skal opptre.

 

Verdsmeister

Torsdag ventar ein ny runde med føredrag i Riddersalen. Til stades er mellom anna konsernsjef Auke Lont i Statnett og statssekretær Rikard Gaarder Knutsen (Frp) frå Olje- og energidepartementet. Dagen og konferansen vert avslutta med skiskyttarverdsmeister Liv Grete Skjelbreid sitt føredrag «Vegen til målet: Energibransjen er i ein viktig omstillingsperiode, korleis takla dette samtidig som mål skal oppnåast».

Dei som ikkje vil på dei siste føredraga, kan i staden vera med på guida tur til Guddalstunet. Utfluktene er i regi av Rosendal Event.

For å innkvartera alle tilreisande er det tinga rom både på fjordhotellet, turisthotellet, Avlsgården, Solheim Turiststasjon og Matre Gjestetun. I tillegg skal veteranskipet MS «Sunnhordland» nyttast til overnatting.

Herborg Kråkevik skal delta på årskonferansen til Distriktsenergi. (Arkivfoto)