Kven blir årets namn for 2016?

Stem på din favoritt - siste sjanse

Kven blir årets namn i Kvinnherad for 2016? Som vanleg er det uhyre jamt i toppen, og kvar einaste stemme tel. 2. juledag klokka 12 stengjer slusene, så no har du siste sjanse til å stemma på din favoritt.

For sjuande gong gjev Grenda lesarane høve til å kåra årets namn i Kvinnherad. I 2010 vann løpstalentet Frida Berge. I 2011 gjekk heideren til det framgangsrike ungdomsbandet Brazzooka, og i 2012 vann eldsjelene i Fjelberg Bygdalag. I 2013 var det eldreopprørarane Mildrid Hartveit, Torborg Skjelnes og Johannes Mehl sin tur, medan industrileiaren Geir Skaala gjekk til topps i 2014. I 2015 sigra baronidirektør Anne Grete Honerød.

I år fekk vi inn uvanleg mange gode forslag frå lesarane, og det var svært vanskeleg å velja ut dei åtte som får vera med i finaleheatet. No vert det særs interessant å sjå kven som får flest røyster. Hugs å gje di røyst til den kandidaten du meiner fortener prisen aller mest, uavhengig av geografi eller kva felt vedkomande har utmerka seg i. Det er berre ei røyst per person, og alle som røystar er med i trekninga av tre flakslodd. Uansett kven det blir, kan vi allereie no slå fast at det blir ein velfortent vinnar!

Artikkelen held fram under annonsen.

 

Røde Kors Besøksteneste

– Dette er kvinner og menn som gjer ein imponerande innsats for mange einsame og sosialt utanfor i vår langstrekte kommune. Dei tar folk med på turar, besøker dei heime og på institusjonar. Gjengen lagar til samvære med bevertning og fellessong, heiter det i forslaget Grenda fekk inn på denne kandidaten. Besøkstenesta i Kvinnherad starta opp i 1985.

 

Tangen Tia/Gunnvor Ullebust 

Tangen Tia var eigentleg kondemnert som travar, og vart lagt ut for sal. Ingen var interesserte før Gunnvor Ullebust frå Høylandsbygd meldte seg. Ho tenkte fyrst å nytta hesten til «Ut på tunet», men Tangen Tia gjorde så stor framgang at ho gjorde comeback på banen. I 2016 enda det med 215.000 kroner innkøyrd etter fem 1. plassar og seks 2. plassar.

Artikkelen held fram under annonsen.

 

Ragnhild Femsteinevik

21-åringen frå Hatlestrand satsar endeleg for fullt på skiskytinga. Det har gitt strålande resultat, og på tampen av året fekk ho sine fyrste startar i verdscupen. I februar og mars slo ho til med deltaking i junior-VM i Romania og gull på NM-stafetten. Vonleg er ho i ferd med å etablera seg i den norske eliten.

 

Bjørn Rune Bergane

– Glimrande rektor gjennom 15 år i Omvikdalen, med høge faglege resultat. Og rektor i Åkra før den tid. Stor trivsel på skulen blant elevar og tilsette, ingen sluttar der friviljug. Arbeidsmiljøprisar, store internasjonale prosjekt, og ikkje minst tiårs-jubileum for TV-Nonshaug i 2016. Elles gjer han mykje innan idrett og friviljug arbeid i Åkra også, ramsar forslagstillaren opp.

Artikkelen held fram under annonsen.

 

Ove Tvedt

66-åringen er blitt pensjonist, men han har slett ikkje sett seg til ro i sofaen. Den årvisse Vardhaugselbasaren styrer Ove framleis på stødig og humoristisk vis, og han var svært sentral i prosessen som i august førde fram til at den nye Blådalshytta kunne opna med stor festivitas. At han og kona Grete avslutta året med å jobba tre månader i slummen på Filippinene, seier mykje om kandidaten sine menneskelege eigenskapar.

 

Pål Haugland

– Årsak: Hans friviljuge dugnadsarbeid gjennom mange år i skigruppa i Uskedalen. Mange unge har fått heilårleg skitrening i mange år i eit unikt, positivt miljø, der kvar einskild har fått treningsopplegg tilpassa eigne behov og ønskje, fortel forslagsstillaren. Pål Haugland er framleis mykje involvert i gruppa. Til dømes var han nyleg med på skisamling på Voss.

Artikkelen held fram under annonsen.

 

Are Ulseth

Kva hadde barne- og ungdomsfotballen i Trio vore utan Are Ulseth? Sanninga er i alle fall at han er svært delaktig i det meste som føregår i fotballgruppa. Spesielt viser det att i Husnes Cup, som veks seg stadig større. I august var cupen arrangert for 16. gong, med 650 deltakarar. 69 laga frå Hordaland og Haugalandet tok turen. – Det vert mykje arbeid, men vi er blide og nøgde etterpå, smilte Ulseth sjølv.

 

Ragni Hestad

Den tidlegare OL-deltakaren har bidrege sterkt i volleyballmiljøet sidan ho flytta til Hatlestrand tidleg på 2000-talet. Dei siste sesongane har ho trena både J15, J17 og J19-laget til Strand-Ulv, og alle desse laga var i år med i NM. Dette er rett og slett imponerande med tanke på nedslagsfeltet til klubben. Eine laget nådde også heilt til kvartfinalen.

Artikkelen held fram under annonsen.