Ynskjer folk velkomen til oppgradert løype

I sommar starta arbeidet med å vøla strekningar av løypene i Tveitedalen ved Utåker.

– Då fekk vi køyrt inn ein del hun, avskjer frå sagbruket på Sandvoll. Åsmund Hjelmeland har ein stor fliskuttar, og med den fekk vi laga til 500-600 kubikk med flis. Så la vi ut 600 meter med vegduk i ein del av traseen der det var myr, og deretter 20-30 centimeter med flis oppå. Det er stort sett ein gjeng pensjonistar og meg som har jobba med det. Vi har hatt fleire heile dagar med prosjektet, smiler Håkon Askeland.

Overkomelege mål

Han er nestleiar i IL Ternen. Han er òg ein av dei ansvarlege, saman med gode medhjelparar, for drifta av skigruppa og anlegget i Tveitedalen.

– Vi har vore heldige og fått låna hengarar og anna utstyr, i tillegg leigde vi inn ein gravemaskin. Samstundes fekk vi grøfta litt, slik at vatnet no blir leia vekk frå løypa. Meininga er å gå vidare med prosjektet, men vi må setja oss overkomelege mål kvar gong. Vona er å få ei rundløype som kan brukast heile året, både til ski, sykling og turar. No skal det dessutan bli lettare for snøen å leggja seg i løypa, utdjupar Askeland.

Plass til fleire

Snøen kom uvanleg tidleg til Tveitedalen i år. Dei ivrigaste har såleis allereie rukke fem-seks turar med ski på beina. Tysdag denne veka var det klart for sesongens fyrste fellestrening.

– Kvar tysdag blir det trening for dei aller yngste, heilt ned til barnehagealder. På onsdagane er det den eldre garde sin tur, det vil seia frå tredje klasse og oppover. Vi set inga aldersgrensa, så alle kan vera med, lokkar Håkon Askeland.

– Korleis er stoda for skigruppa dykkar?

– Det er ikkje veldig mange som er med, så det er plass til fleire. Eg vil gjerne oppmoda folk til å delta, seier Askeland.

Han ynskjer å retta ei takk til alle som har vore med på dugnadane og elles i drifta av skigruppa og Tveitedalen. I tillegg takkar han alle som lånte ut maskiner og utstyr til arbeidet.

– No vonar vi at folk vil nytta løypa heile året, avsluttar han.