VM-sølv til Guro: – Godt nøgd med VM-innsatsen

– Eg er veldig fornøgd, seier ei smilande Guro Femsteinevik etter at sølvmedaljen var i boks.

– Det har vore eit veldig greitt VM til no. Eg er veldig nøgd med normalen, medan sprinten vart litt irriterande, då eg bomma på eitt skot på kvar av dei to skytingane, seier Guro til Grenda.

Fellesstarten på torsdag er ho minst nøgd med.

– Eg var skuffa då eg kom i mål, for eg følte eg kunne gjort meir. Eg gjekk med bra fart sporet og hadde god flyt. To bom på ei liggjande skyting skal ikkje skje. Eg hadde vore blant topp 10 med treff der, er eigenvurderinga hennar etter løpet.

Fire av fem øvingar

Det er fem norske jenter i troppen til junior-VM. Guro og to til er frå 2004-årgangen, og har framleis to sesongar att som juniorar.

– Forbundet vil at me skal læra og utvikla oss på denne meisterskapen. Eg hadde hatt lyst å gjera det endå betre, for eg har hatt jamne løp, men er eigentleg fornøgd, seier Guro om eigen innsats.

Det er sagt at det er veldig høgt nivå på juniorjentene i år.

– Ein av trenarane seier det er det høgast han nokon gong hadde sett i klassen. Dei aller beste har gått verdscup allereie for stornasjonar som Sverige og Tyskland, forklarer Guro.

– Har det gitt meirsmak?

– Veldig, og det har vore kjekt! Eg får sjå kor gode dei andre også er, dei går fort, skyt godt og ein må ha maksutteljing for nå opp, seier Femsteinevik.

Ettersom ho også fekk gå stafett som avslutta meisterskapen, betyr at ho har gått alt utanom opningsøvinga mix-stafett.

– Det er eg nøgd med og glad for. Stafett er veldig gøy. Du er endå meir del av eit lag. Du har lyst å få det til for laget sin del.

Før løpet tykte ho at dei norske jentene hadde «eit ganske bra lag», og vurderte Tyskland og Frankrike som dei tøffaste konkurrentane.