Veldig god etappe av Ragnhild

Det svinga veldig for det norske laget på dei to fyrste etappane, som vart gjennomførte av Filip Fjeld Andersen og Johannes Dale. Sistnemnde leia inn til ståande skyting på den 2. etappen, men sprakk diverre fullstendig. Karoline Knotten på 3. etappe sendte Ragnhild Femsteinevik ut på 6. plass 1.31,5 bak den leiande storfavoritten Frankrike.

Ragnhild kom veldig godt i gang.

– Dette er strålande av Ragnhild Femsteinevik, sa NRK-kommentator Andreas Stabrun Smith då Ragnhild hadde redusert avstanden til 1.24 på fyrste måling.

Hatlestrendingen skaut svært raskt på liggjande, men måtte bruka eitt ekstraskot.

På neste runde la Ragnhild seg i rygg på den tyske løparen, noko som var ein lur strategi.

– Ragnhild ser ut til å ha ein veldig bra dag i løypa, meldte Smith.

Fram mot VM

På ståande skyting leverte ho endå ein lynrask serie, sjølv om det vart eitt ekstraskot til.

– Meget bra gjennomført av Ragnhild Femsteinevik, roste sjølvaste Ola Lunde.

– Morsomt at Ragnhild Femsteinevik byr opp til dans, supplerte Andreas Stabrun Smith.

Ragnhild prøvde å halda kontakten med Tyskland, men måtte etter kvart sleppa. Dermed enda det med 6. plass for Norge, 1.42 bak Frankrike.

– Ragnhild Femsteinevik skal seia seg meget godt nøgd med etappen ho leverer, oppsummerte NRK.

Det var ho samd i sjølv også i intervjuet etterpå. Ho fekk då spørsmål om strategien med å følgja Tyskland.

– Det var tungt. Eg tenkte eg skulle prøva så langt det haldt, og er veldig nøgd med at eg klarte å henga på så lenge, sa ho.

Det er også verdt å merka seg det NRK sin ekspert Harri Luchsinger sa:

– Ragnhild er i god utvikling fram mot VM i Oberhof.

Ja, tenk om Kvinnherad vert representert i verdsmeisterskapen i ein så stor idrett som skiskyting!