Vart norsk meister: – No må eg ha is!
Cecilie Sundal Utne frå Rosendal vann skogsløp under Landsskyttarstemnet torsdag ettermiddag. Systera Amalie tok bronsen.
Publisert
Sist oppdatert
Syskena Sundal Utne verkeleg herja i skogsløpet under Landsskyttarstemnet i Steinkjer. Dei kan reisa heim med ei fantastisk medaljesamling etter konkurransen som også vert rekna som Norgesmeisterskap.
I klasse Eldre rekrutt gjekk 14 år gamle Cecilie Sundal Utne heilt til topps. Etter feltskytinga låg ho på 7. plass, eitt minutt bak leiinga. Men på torsdagens 3 kilometer lange løpskonkurranse var ho ikkje til å stoppa, og kom i mål heile 1 minutt og 49 sekund føre nummer to.
Annonse
– Ho blåste ifrå, fortel ein stolt pappa Øyvind Utne, som legg til at både fotballspelarar, langrennsløparar og orienteringsløparar stilte til start, så det var høgt nivå.
God kontroll
Grenda rakk også nokre ord med Cecilie rett før premieutdelinga.
– Kjempegøy, seier ho om sigeren.
Annonse
– Hadde du venta å vinna?
– Nei! Men eg håpa å greia topp tre i alle fall, opplyser ho.
– Hadde du god kontroll?
– Ja! Eg leia litt mindre enn halve løpet.
– Vert det noko feiring?
– Ja, no må eg ha is, slår ho fast.
Annonse
Bronse
Systera Amalie stilte i rekruttklassen. Utgangspunktet var 14. plass, tre minuttar etter teten. Ho sprang seg heilt opp til bronseplass.
Broren Peder starta som nummer 11 i guteklassen, to minuttar etter leiinga. Han står førebels oppført på 4. plass, men lista er ikkje offisiell enno grunna noko rot med startoppstillinga. Peder enda 1.35 bak vinnaren, og 46 sekundar bak medalje.
