Vart cupmeister på mest dramatiske vis
Tina Abdulla scora eit av kampens viktigaste mål då Storhamar endeleg vann cupfinalen. Men alt måtte avgjerast på straffekast.
Publisert
Sist oppdatert
Søndag ettermiddag vart cupfinalen i handball spela på Unity Arena på Fornebu, og sendt direkte på Tv 2. Der møttest Storhamar og Tertnes, som begge har vore i finalen tre gonger tidlegare, men ingen av dei har teke med seg gullet før. Problemet har fyrst og fremst vore at Vipers Kristiansand har stått i vegen, og sikra seg sju strake sigar. Tidlegare var det Larvik som hindra andre klubbar i å vinna.
I dagens cupfinale var Storhamar stort sett i leiinga heile tida, og til pause stod det 14-10. Utover i andre omgang auka avstanden til seks mål, men mot slutten kom plutseleg Tertnes heilt opp i ryggen. Difor var det svært viktig at Tina Abdulla netta til 22-20 etter vel 56 minuttar.
Annonse
Innspurten vart dramatisk, og etter 59.00 stod det 22-22. Storhamar vart avblåste i neste angrep, men Tertnes rakk ikkje å scora dei heller. Dermed måtte det heile avgjerast på straffekast.
Den vann Storhamar 5-4, etter at keeper redda Tertnes sin femte og siste. Tina Abdulla tok den fjerde straffen for gultrøyene frå Hamar.
Tina Abdulla noterte seg for tre mål i ordinær tid. Dette er husnesingen sin siste sesong i Storhamar. Kva neste klubb blir, er ikkje avslørt enno.
