Vart beste norske i verdscupen: – Kjempenøgd med løpet

Ragnhild Femsteinevik sitt comeback i verdscupen var svært vellukka. Kanskje til og med så vellukka at ho plutseleg er aktuell for VM?

Torsdag representerte Ragnhild Femsteinevik Norge i verdscupen i tyske Ruhpolding. Dit var ho kvalifisert både etter eigne gode prestasjonar i IBU-cupen, men òg fordi Ingrid Landmark Tandrevold valde å stå over for å trena i høgda.

Femsteinevik nytta sjansen veldig godt. Torsdag stod 15 kilometer på programmet føre den store folkemengda som alltid trekkjer til Ruhpolding. Hatlestrendingen vart nummer 17, og dermed beste norske med god margin. Ho kom i mål 3 minutt og 13 sekund bak den franske vinnaren Lou Jeanmonnot.

På fyrste liggjande brukte Femsteinevik 28,5 sekundar og skaut éin bom. På fyrste ståande var tida 22,7 sekundar, og også der vart det éin bom. Så var det klart for tredje skyting, som var liggjande. Tida vart 32,8 sekundar og det fjerde skotet gjekk utanfor. Til slutt skaut ho feilfritt ståande på 31,9 sekundar. Dermed i alt tre tilleggsminutt.

Kjempenøgd

– Det var veldig deileg. Kjekt å vera her. Eg er kjempenøgd med løpet. Tre bom for min del akkurat no, er veldig bra. Spesielt er eg veldig nøgd med siste skyting. Eg opna litt hardt, kanskje, men synest eg klarte å halda det ganske bra, kommenterte Hatlestrand-ekspressen til NRK etter løpet.

Tala stadfestar at Femsteinevik opna hardt, for ho noterte nest beste tid på fyrste runde. NRK spurde vidare kva ho var mest nøgd med i løpet.

– Eigentleg skytinga, og at eg klarte å skyta fullt på siste. Og så kjenner eg at det er ikkje så langt frå med dei andre heller, så eg er veldig nøgd med det.

NRK hevda at det var ei løype som passa Femsteinevik bra. Det var ho samd i.

– Eg synest eg går bra mot slutten, og ganske bra i lette parti. Men den brattaste bakken er tung, og eg er ikkje så god på tungt føre. Men alt i alt ganske bra, svarte ho.

Verdsmeisterskapen

Resultatet, og ikkje minst det faktum at ho var klart betre enn dei andre med norsk flagg på brystet, gjer at Ragnhild Femsteinevik plutseleg er med i diskusjonen om plass i verdsmeisterskapen.

– Er målet å koma seg til VM? undra statskanalen.

– Nei, eigentleg ikkje. Eg har berre lyst å gå gode skirenn. Men eg er glad viss eg får lov å gå VM, sa Ragnhild som reknar med ho må levera fleire sterke løp for å koma med i troppen.

Konkurransane i Ruhpolding held fram med stafett på laurdag og fellesstart på søndag.