Unge kvinnheringar til topps på skiskyttarfestival

Skiskyttarfestivalen er eit stort arrangement for barn og unge frå 16 år og nedover, med så mange som kring tusen deltakarar. Grunna manglande skiskyttarlag her i Kvinnherad går alle sju som deltok i helga for Hålandsdalen IL.

Suverent

Ein av foreldrene som var med dei unge skiløparane denne helga var pappa Kjetil Mehl, som kunne fortelje om ei lang med eitt klart høgdepunkt.

– Det har vore ei lang helg. Det er jo eit stort arrangement, då det er klart at ting tek litt tid, i alle fall når tusen deltakarar skal gjennom løypene. Me kom heim klokka ti i går kveld(sundag, journ.merk.). Det store høgdepunktet gjennom helga var utan tvil fredagen, fortalde Mehl.

– Då hadde me eit mixlag i klassen 11-12 år der alle tre hadde sitt livs løp den dagen. Dei hadde ingen bom, og vann suverent i ein klasse med 28 lag. Det var veldig bra, og redda heile helga. På laurdag og sundag var det noko utfordrande vindforhold der oppe med veldig mykje vind. Då vart det ein del bom på mange, fortalde han vidare.

Trass i vanskelege tilhøve resten av helga var det mange som gjekk gode løp, sjølv om topplasseringane uteblei. Og skiskyttarane sjølve var i all hovudsak nøgde etter helga.

– Dei var strålande nøgde med stafetten i alle fall, dei gliste frå øyra til øyra. Sjølvsagt er det alltid nokon som blir sinte og sure når ting ikkje går som dei hadde tenkt, men smilet kjem likevel fort tilbake igjen. Dei er stort sett nøgde alle saman, og er klare for å koma tilbake neste år. Motivasjonen er heilt klart på topp, konstaterte Mehl.

Lange dagar

Det var ei helg som stort sett handla om skiskyting, for så mykje anna enn skiskytingsrelatert vart det ikkje tid til i fylgje den engasjerte pappaen.

– Det har blitt lange dagar på arenaen og ikkje tid til så mykje anna. Dei starta med innskyting kvar dag i halv åtte-tida der dei skal skyta på pappblinkar. Så er det ny innskyting seinare for dei som skal gå renn på ettermiddagen. For familiar med fleire ungar der nokon starta tidleg og andre seint, så endar du opp med å vera der oppe frå halv åtte-tida til borti fem-seks, forklarte Mehl.

– Heldigvis var det sol og fint vêr, sjølv om det var mykje venting. Me prøvde å slappa innimellom slaga, åt gode nister og sjølvsagt heia på dei andre løparane. Så på kvelden var det premieshow der blant anna Ingrid Landmark Tandrevold og Tarjei Bø delte ut premiar. Det var stas, la han til.

Alle som deltok frå Kvinnherad var:

•Peder Sundal Utne

•Amalie Sundal Utne

•Cecilie Sundal Utne

•Tomas Hjortland

•Gitle Femsteinevik

•Maiken Mehl

•Sondre Mehl