Tristan tok teten: – Vore meir logisk

Niels Jakob Erlingsson fekk ikkje vera i teten veldig lenge. I runde 14 sikra han seg «berre» 64 poeng, men når Tristan Thorkildsen Thorsen fleska til med 91, så var det klart for ein ny mann i den gule leiartrøya.

– Det er kjekt, seier ein beskjeden Tristan til Grenda.

– Jobbar du mykje med laget ditt?

– Eg brukar ikkje så mykje tid, men eg synest det er kjekt med fotball og eg likar Premier League, så dette er berre ein ekstra måte å følgja med på, seier Liverpool-supporteren.

Angripar for Trio

Tristan spelar også fotball sjølv, som angripar for Trio. Han meldte overgang frå Haugar til Trio i vår, etter å ha gått to år på toppidrettslinja i Haugesund. No tek 18-åringen siste året på vidaregåande skule på Husnes, der han går på studiespesialisering.

– Kva er det som gjer at du har lukkast så godt med Fantasy denne sesongen?

– Eg har ikkje følgd fotballhjarta så mykje som før, men vore meir logisk. Tidlegare har eg fylt opp med Liverpool-spelarar, seier Tristan Thorsen.

– Kan det halda heile sesongen?

– Viss eg skal vera heilt ærleg, så spørst det om det held heilt ut. Men eg skal gjera eit forsøk, opplyser valebuen.

Suverene Hilde

I runde 14 var det elles Hilde Røyrvik som var aller best. Ikkje berre var ho best, ho var suveren. Hilde noterte seg nemleg for 106 poeng. Kjell Erik Taranger var den einaste andre som passerte 100 poeng, med 101. Deretter må vi ned på 93 poeng, der vi finn Grenda sin eigen Jarle Håvik, som er svært godtgåande for tida.

Hilde Røyrvik hadde mange svært poenggjevande spelarar på laget. Pickford i mål, Saliba i forsvar, Salah som kaptein, Madueke på midten og Watkins på topp. Ho avanserer også i samandraget, og er no heilt oppe på 9. plass totalt.

Hugs at runde 15 startar allereie i morgon. Frist for å gjera endringar er laurdag klokka 12.00.

Topp 10 runde 14

Nr., Lag, Manager, Poeng runde 14, Poeng totalt

1. Røyrvik, Hilde Røyrvik, 106, 902

2. Jonavegen FC, Kjell Erik Taranger, 101, 720

3. JHFC, Jarle Håvik, 93, 869

4. Peppelinos Bar, Thomas Hellen, 92, 879

5. high achievements, Tristan Thorsen, 91, 952

5. Rodinhos, Kristoffer Rød, 91, 787

7. Slå Blindside FC, Frode Havnerås, 88, 813

7. Burgerheimer, Marcus Berge, 88, 806

9. Livets vann, Johan Feet, 87, 836

10. The Hedgehogs, Hege Eikenes, 86, 850

Topp 10 samanlagt

Nr., Lag, Manager, Poeng runde 14, Poeng totalt

1. high achievements, Tristan Thorsen, 91, 952

2. Petit Four, Niels Jakob Erlingsson, 64, 946

3. YNWA-Voss, Terje Øye, 69, 911

4. Dreamteam, Kenneth Sjo, 85, 909

4. Vareld FC, Oddbjørn Sandvik, 69, 909

4. Bleikfeite Hyser, Fabian Ruud, 72, 909

7. Roligstart, Tony Fondevik, 73, 907

8. Mine Utvalgte, Martin Haga, 53, 905

9. Røyrvik, Hilde Røyrvik, 106, 902

10. lordhall97, Tom-Marcus Ferstad Hall, 76, 901