Trio vann både heime og borte

Volleyballdamene til Trio drog to sigrar i land i løpet av helga. På heimebane slo dei Rossvoll 3-0 i sett, og på bortebane slo dei Viking 3-1.

Laurdag møtte Trio eit ungt Rossvoll-lag i Husneshallen. Trio-trenar Robert Haugland seier motstandarane var teknisk flinke, gode og jobba godt. Han har tidlegare berre sett resultata deira på papiret, og var førebudd på det verste.

– Det var spanande å endeleg møta dei, seier han.

I første sett overraska Trio bortelaget med ein sterk start, og vann første sett 25-18.

– Eg snakka med trenaren deira etterpå. Han seier dei ikkje har møtt slik motstand før. Dei fekk seg ein vekkjar, men mista motivasjonen, seier Haugland.

Det var nok også grunnen til at Trio vann såpass kraftig i 2. sett. Resultatet der vart til slutt 25-11. I siste sett mangla Trio litt fokus.

– Vi rota litt, fordi vi følte vi hadde vunne kampen. Motstandaren tok nokre unødvendige poeng. Men vi tok ein time out for å finna att fokus. Etter det fekk ikkje Rossvoll fleire poeng, seier trenaren.

Tredje sett enda til slutt 25-18.

– Eit supert resultat, slår Haugland fast.

Søndag møtte Trio Viking på bortebane. Dei ligg på andreplass på tabellen, og siger betydde mykje for begge laga.

– Vi møtte eit betre lag, og var nervøse i starten. Vi hadde taktikken klar, men gjorde mange personlege feil, vurderer Haugland.

Likevel vann Trio 1. sett. 2. sett gjekk til heimelaget. Men då hadde Trio lagt nervane bak seg.

– I 3. sett fann vi tilbake til forma vi eigentleg har, og fekk att trua på at det var mogleg å vinna. Vi kara til oss settet, fortel trenaren.

I 4. sett hadde Trio det psykologiske overtaket, og hadde kome skikkeleg inn i kampen.

– Vi spelte bra, og vi høyrde på lydnivået og såg på oppførselen til motstandaren at dei hadde gjeve opp, seier han.

Haugland kallar det ikkje ein optimal kamp, men er nøgd med resultatet.

– Med atterhald om at eg har lese tala rett, er det ingen som kan ta frå oss førsteplassen i ligaen no, seier trenar Robert Haugland.

Det er han svært nøgd med. Men for å kåra ein seriemeister er det ikkje nok å vinna ligaen. I volleyball følgjer ein to system, både liga og ei rankingturnering. Det er det samla resultatet av desse som avgjer kven som vinn serien.

– I år vert det avgjort på Husnes. 12.mars er det rankingturnering, og då håpar vi mange frå Kvinnherad kjem for å sjå. Det blir ein spanande dag for oss, seier trenaren.