Trio og Rosendal går saman om eit herrelag

Rosendal og Trio er einige om eit samarbeid i herrefotballen.

For å få på plass eit kamptilbod til flest mogleg, har Trio og Rosendal no fått på plass ein samarbeidsavtale for herrane på seniornivå. Laget skal etter alle solemerke spela i 7. divisjon komande sesong.

–  Samarbeidsavtalen er signert og vi har sendt inn søknad. At vi no får til eit samarbeid er eg veldig happy med. Dette er eit samarbeid som engasjerer og som gir ein gevinst for alle partar. Viktigast av alt så betyr det at herrelagsspelarar får eit tilbod igjen, seier leiar Reinhard Lund-Mikkelson i Rosendal fotball.

 

Vinn-vinn

Laget vil bestå av spelarar frå både Rosendal og Trio, og vil bera namnet Rosendal/Trio i 7. divisjon. Det er turnlaget som har teke på seg det administrative ansvaret av laget.

– Samarbeidsavtalen er komen på plass, men framleis står det att å finna ut av ein god del praktiske ting. Blant anna treningsaktivitet og slike ting, seier Reinhard.

At dette samarbeidet er bra for alle partar, kan leiar Fred Nilsen i Trio fotball skriva under på.

– Styret i Trio og det sportslege utvalet i Trio ynskjer dette her. Dette gjer Trio for å hjelpa seg sjølv, men også for å hjelpa Rosendal. Så dette er ein vinn-vinn for begge laga, seier leiar i Trio-fotball, Fred Nilsen og legg til:

– Det er spelarane som ikkje har eit speltilbod i dag vi tenkjer på, og det er dei vi har eit fokus på å få på plass eit tilbod til, og det vil dette samarbeidet bidra til. Så dette er berre kjekt, seier Nilsen.