Trio avlyser årets Husnes Cup

Styret i Trio si fotballgruppe har med tungt hjarta vedteke å avlysa Husnes Cup 2021.

Med bakgrunn i usikkerheita rundt covid-19, og då hovudsakeleg med tanke på retningslinjene for overnatting, har IL Trio no vedteke å avlysa årets Husnes Cup.

– Vi veit ikkje om vi får ha overnatting, og er eigentleg litt seint ute når det kjem til invitasjonar allereie. Så no har vi bestemt oss for å avlysa, at Husnes Cup-gjengen skal få kvila og mobilisera til neste års cup. Då vert det 20-årsjubileum to år for seint, seier leiar Fred Nilsen i fotballgruppa.

Men sjølv om klubben etter å ha gått fleire rundar med seg sjølv landa på å avlysa årets cupturnering, skal dei likevel gjera sitt for å halda aktivitetsnivået oppe.

– Når vi kjem til hausten så må det ha letta litt både her og der. Då må vi få mest mogleg ut av den for å halda på medlemene våre. Då tenker vi å arrangera ein alternativ dagscup, seier Nilsen.

Korleis den blir er endå ikkje bestemt, men Nilsen tenker at det kan bli spel for dei mellom 10 og 13 år laurdag, og dei frå 14 til 16 år søndag.

– Og kanskje vi kan få med oss dei som er eldre enn det også. Vi vil i alle fall prøva å famna så breitt som mogleg med denne cupen, seier Nilsen.