Tomålssiger i siste heimekamp

Rosendal hadde medvind i første omgang, utan at det vart ein soleklar fordel for kvittrøyene. Eit jamt overtak gav ikkje utteljing før Martin Hjelmeland Arnesen vrei seg fri på kanten av 16-meteren og banka ballen i motsett kryss.

I motvinden etter pause vart det på fleire vis enklare å spela, og spesielt Sander Simensen Haraldseid vart sendt inn bak Bergen Nord-forsvaret gong på gong. Det betalte seg i form av eitt mål og ein serie med farlege innlegg.

– Me gjorde jobben, men det var vanskelege forhold og me var litt slurvete her og der. Me kunne kome til nokre fleire store sjansar, men gutane fullførte skikkeleg og gjorde det dei skulle, oppsummerte Enes etter kampen.

Han måtte overtala nevøen Theodor Bartlett Enes Mehl til å vakta målet i kampen.

– Sporty av Theo å gjera det, rosa onkel Yngve.

– Eg heldt nullen, gliste Theo, og la til:

– Då trur eg at eg har spelt på alle posisjonar i laget i løpet av denne sesongen, slutta 20-åringen.