Tok seg komfortabelt til kvartfinale

Storhamar laga målshow då dei reiste til Ski for å møta Follo i åttandedelsfinalen i NM onsdag kveld. Gjestene frå Hamar starta godt over lovleg fartsgrense, og leia imponerande 7-0 før fem minutt var spelt. Dei dundra vidare utover omgangen, og la 23 ballar bak Annika Petersen i Follo-buret før første omgang var over. Det sikra tolv måls leiing før sluttomgangen.

Sjølv om laget slo på bremsa litt, vann dei også andre omgang, slik at sluttresultatet enda på 36-22 i favør Mjøs-laget. Tina Abdulla noterte seg blant anna for to mål i den frenetiske opninga av kampen, og slutta på totalt seks nettkjenningar før avansementet var formelt sikra. Kvartfinalemotstandar i cupen vert trekt på torsdag ettermiddag. Neste runde i cupen skal spelast 8./9. november.